عمرکوٹ: سول اسپتال مٹھی میں غذائی قلت اور بیماریوں کے باعث 6 بچے مزید جاں بحق

عمرکوٹ کے سول اسپتال مٹھی میں غذائی قلت اور مختلف بیماریوں کے باعث مزید 6 بچوں کی ہلاکت ہوئی، جس کے بعد ایک ماہ کے دوران جاں بحق ہونے والے بچوں کی تعداد 50 تک پہنچ گئی۔

ذرائع کے مطابق زیر علاج بچوں کی ہلاکتیں گزشتہ پانچ دن کے دوران ہوئی ہیں، جبکہ جاں بحق ہونے والے تمام بچوں کی عمریں ایک سال سے کم تھیں۔ اسپتال ذرائع نے بتایا کہ ان بچوں کا وزن پیدائش کے وقت ہی کم تھا اور دورانِ علاج وہ جانبر نہ ہو سکے۔

شہریوں اور والدین کا کہنا ہے کہ اسپتال کے انتہائی نگہداشت وارڈ میں طبی سہولیات ناکافی ہیں اور لیب ٹیسٹ اور ادویات کے لیے نجی اسٹورز پر انحصار کرنا پڑتا ہے۔ والدین نے وزیر اعلیٰ سندھ سے مطالبہ کیا ہے کہ فوری نوٹس لیتے ہوئے اسپتال میں طبی سہولیات کو بہتر بنایا جائے۔