برطانیہ: وزن گھٹانے کے لیے روزانہ ایک بار استعمال ہونے والی نئی گولی منظور

برطانیہ وزن کم کرنے اور ٹائپ 2 ذیابیطس کے علاج میں مدد دینے والی روزانہ استعمال کی جانے والی نئی گولی ‘اورفورگلیپرون’ (Orforglipron) کی منظوری دینے والا یورپ کا پہلا ملک بن گیا ہے۔ برطانوی ‘میڈیسنز اینڈ ہیلتھ کیئر پروڈکٹس ریگولیٹری ایجنسی’ نے معروف دوا ساز کمپنی ایلی لِلی (Eli Lilly) کی تیار کردہ اس دوا کو منظوری دی ہے، جسے ‘فونڈایو’ (Fondaeu) کے تجارتی نام سے فروخت کیا جائے گا۔ یہ دوا ایک جی ایل پی-1 (GLP-1) ریسیپٹر ایگنسٹ ہے جو خون میں شوگر کی سطح کم کرنے، نظامِ ہاضمہ میں خوراک کو سست کرنے اور بھوک کو کنٹرول کرنے میں مدد دیتی ہے۔

یہ دوا کم کیلوریز والی غذا اور ورزشی روٹین کے ساتھ ان افراد کے لیے منظور کی گئی ہے جن کا بی ایم آئی (BMI) 30 یا اس سے زائد ہو، جبکہ 27 سے 30 بی ایم آئی والے وہ افراد بھی اسے استعمال کر سکتے ہیں جو وزن سے جڑے کسی طبی مسئلے کا شکار ہوں۔ اس کے علاوہ، یہ ٹائپ 2 ذیابیطس کے ان مریضوں کے لیے بھی انتہائی مفید ہے جن کی شوگر مناسب طور پر کنٹرول نہ ہو رہی ہو۔ کھانے یا پانی کی کسی مخصوص پابندی کے بغیر دن میں صرف ایک بار لی جانے والی یہ گولی ان لوگوں کے لیے ایک انتہائی آسان اور بہترین متبادل ثابت ہوگی جو انجیکشن کے مقابلے میں گولی کو ترجیح دیتے ہیں۔