تربت میں 120 بستروں پر مشتمل ایف سی ہسپتال عوام کیلئے کھول دیا گیا

تربت: بلوچستان کے مکران ڈویژن کے مرکز تربت میں عوام کو عالمی معیار کی طبی سہولیات کی فراہمی کے لیے 120 بستروں (Beds) پر مشتمل جدید ترین ایف سی ہسپتال مکمل کر کے باقاعدہ طور پر کھول دیا گیا ہے۔ ایف سی بلوچستان ساؤتھ کے خصوصی تعاون سے قائم کیے گئے اس اسٹیٹ آف دی آرٹ ہسپتال میں چوبیس گھنٹے ایمرجنسی اور ٹراما کیئر (Trauma Care) سروسز فعال رہیں گی، جس سے مقامی آبادی کو ہنگامی حالات میں علاج کے لیے دیگر دور دراز شہروں کا رخ نہیں کرنا پڑے گا۔ ہسپتال میں مریضوں کی درست اور فوری تشخیص کے لیے سی ٹی اسکین (CT Scan)، ایم آر آئی (MRI)، الٹراساؤنڈ اور دیگر جدید ترین لیبارٹری ٹیسٹوں کی سہولیات بھی ایک ہی چھت تلے مہیا کی گئی ہیں۔

خواتین اور بچوں کی صحت کی دیکھ بھال کو خصوصی ترجیح دیتے ہوئے ہسپتال میں ایک جدید ترین گائنی اور پیڈیاٹرک شعبہ قائم کیا گیا ہے، جہاں تربیت یافتہ عملہ اور جدید مشینری تعینات کی گئی ہے۔ اس کے علاوہ ہسپتال میں جنرل میڈیسن سے لے کر نیورو سرجری جیسے انتہائی حساس اور پیچیدہ شعبوں کے ماہر ڈاکٹرز اور سرجنز بھی تعینات کیے گئے ہیں، جن کی معاونت کے لیے جدید ترین آپریشن تھیٹرز چوبیس گھنٹے تیار رہیں گے۔ تکنیکی اور انتظامی انفراسٹرکچر کے لحاظ سے ہسپتال کو خود کفیل بنانے کے لیے اس میں اپنا آکسیجن جنریشن پلانٹ اور بلاتعطل بجلی کی فراہمی کے لیے 1.1 میگاواٹ کا پاور بیک اپ سسٹم بھی نصب کیا گیا ہے، جبکہ عالمی طبی معیارات کے مطابق انفیکشن اور جراثیم سے بچاؤ کا جدید ترین ڈس انفیکشن نظام بھی کام کر رہا ہے۔ تربت اور گردونواح کے عوام نے صحت کے میدان میں اس انقلابی منصوبے کی تکمیل پر ایف سی ساؤتھ اور پاک فوج کی مخلصانہ کوششوں کو زبردست خراجِ تحسین پیش کیا ہے۔