کبیر والا میں خسرہ سے ایک ہی خاندان کے 3 بچے جاں بحق

خانیوال کی تحصیل کبیروالا کے نواحی علاقے موضع شکروالا قتالپور میں مبینہ طور پر خسرہ کی وبا پھیلنے سے ایک ہی خاندان کے تین کمسن بچے تین روز کے اندر جاں بحق ہو گئے۔ تین معصوم بچوں کی اچانک ہلاکت کی خبر پھیلتے ہی علاقے میں خوف و ہراس اور شدید تشویش کی لہر دوڑ گئی ہے۔

واقعے کی اطلاع ملتے ہی محکمہ صحت کی ٹیمیں فوری طور پر موضع شکروالا پہنچیں اور تمام علاقے میں گھر گھر جا کر جامع سکریننگ کا عمل شروع کر دیا۔ ڈپٹی ڈی ایچ او کے مطابق سکریننگ کے دوران اسی خاندان اور جوار کے مزید پانچ بچوں میں بھی بیماری کی علامات پائی گئیں، جنہیں فوری طبی امداد کی فراہمی کے لیے تحصیل ہیڈکوارٹر (THQ) اسپتال منتقل کر دیا گیا ہے۔

محکمہ صحت کے حکام کا کہنا ہے کہ تمام متاثرہ بچوں کو بہترین طبی سہولیات فراہم کی جا رہی ہیں۔ تاہم، حکام کا یہ بھی کہنا ہے کہ بچوں کی ہلاکتوں کی اصل وجہ اور خسرہ کی حتمی تصدیق طبی معائنہ مکمل ہونے اور لیبارٹری رپورٹس موصول ہونے کے بعد ہی ممکن ہو سکے گی