ذیلی قومی انسدادِ پولیو مہم کامیاب، 2 کروڑ 93 لاکھ سے زائد بچوں کو قطرے پلائے گئے: نیشنل ایمرجنسی آپریشن سنٹر

نیشنل ایمرجنسی آپریشن سنٹر کے مطابق ملک بھر میں ذیلی قومی انسدادِ پولیو مہم کامیابی کے ساتھ مکمل کر لی گئی ہے، جس کے دوران 2 کروڑ 93 لاکھ سے زائد بچوں کو پولیو سے بچاؤ کے قطرے پلائے گئے۔ یہ مہم 21 سے 27 ستمبر تک 113 منتخب اضلاع میں چلائی گئی جس میں پنجاب، سندھ، خیبرپختونخوا، بلوچستان، اسلام آباد اور گلگت بلتستان کے علاقے شامل تھے۔ اس مہم میں 2 لاکھ 73 ہزار سے زائد فرنٹ لائن ورکرز نے حصہ لیا، تاہم سیکیورٹی خدشات کے باعث جنوبی خیبرپختونخوا میں بچوں تک ویکسین کی رسائی متاثر ہوئی۔ صوبائی اعداد و شمار کے مطابق پنجاب کے 11 اضلاع میں 90 لاکھ 70 ہزار، سندھ کے 30 اضلاع میں ایک کروڑ 14 لاکھ، خیبرپختونخوا کے 37 اضلاع میں 72 لاکھ 10 ہزار، بلوچستان کے 32 اضلاع میں 23 لاکھ 20 ہزار، اسلام آباد میں 4 لاکھ 43 ہزار اور گلگت بلتستان کے دو اضلاع میں تقریباً ایک لاکھ 40 ہزار بچوں کی ویکسینیشن کی گئی۔