اچھی نیند لینا کیوں ضروری ہے؟ نئی تحقیق میں اہم انکشاف

اگر آپ ہائی بلڈ شوگر اور ٹائپ ٹو ذیابیطس جیسے دائمی امراض کے خطرے کو جڑ سے کم کرنا چاہتے ہیں، تو روزانہ مناسب دورانیے کی نیند کو اپنی زندگی کا مستقل حصہ بنا لیں۔ ڈنمارک میں ہونے والی ایک نئی طبی تحقیق سے معلوم ہوا ہے کہ اچھی اور مکمل نیند نہ صرف دماغ بلکہ جسم کے میٹابولزم اور بلڈ شوگر کو بھی صحت مند رکھنے میں کلیدی کردار ادا کرتی ہے۔

کوپن ہیگن یونیورسٹی کے محققین کی جانب سے کی جانے والی اس تحقیق کے مطابق، جو نوجوان روزانہ رات میں 7 سے 8 گھنٹے کی بھرپور نیند لیتے ہیں، ان میں اگلے دن خون میں شوگر کی سطح زیادہ دیر تک متوازن رہتی ہے۔ ماہرین کا کہنا ہے کہ اس سے ظاہر ہوتا ہے کہ نیند، ذیابیطس جیسی بیماریوں کے ظاہر ہونے سے کئی سال پہلے ہی جسم کے میٹابولک نظام پر مثبت اثرات ڈالنا شروع کر دیتی ہے۔ اس تحقیق میں 18 سال کی عمر کے 206 نوجوانوں کو شامل کیا گیا تھا، جن کی دو ہفتوں تک ایکٹیویٹی ٹریکرز اور گلوکوز مانیٹرنگ سینسرز کے ذریعے نیند اور بلڈ شوگر کی سطح کا تفصیلی جائزہ لیا گیا۔

تحقیقی نتائج سے معلوم ہوا کہ جن افراد نے زیادہ اور بہتر نیند لی، ان کے بلڈ شوگر میں اتار چڑھاؤ نمایاں طور پر کم رہا۔ ماہرین کے مطابق خون میں شوگر کی سطح کا بار بار تیزی سے بدلنا جسم میں سوزش، میٹابولزم پر دباؤ، موٹاپے اور بعد ازاں ٹائپ ٹو ذیابیطس کا سبب بنتا ہے۔ تحقیق میں یہ دلچسپ بات بھی سامنے آئی کہ زیادہ دیر تک سونے والے افراد میں صبح کے وقت بلڈ شوگر کی سطح معمولی زیادہ ہوتی ہے، جو کہ نقصان دہ نہیں بلکہ فائدہ مند ہے۔ یہ معمولی اضافہ انسان میں میٹھا کھانے کی خواہش کو کم کرتا ہے اور پورے دن بلڈ شوگر کو متوازن رکھنے میں مدد دیتا ہے۔

محققین نے نشاندہی کی کہ نوجوان اکثر یہ سمجھتے ہیں کہ ذیابیطس صرف بڑی عمر کے افراد کی بیماری ہے، حالانکہ کم عمری میں بھی بلڈ شوگر کی سطح بری طرح متاثر ہو سکتی ہے۔ اگرچہ سائنسدان ابھی یہ واضح نہیں کر سکے کہ نیند اور بلڈ شوگر کے درمیان یہ تعلق کس حیاتیاتی نظام کے ذریعے قائم ہوتا ہے، تاہم نتائج سے یہ ثابت ہوتا ہے کہ معیاری نیند جسمانی صحت، فعال میٹابولزم اور مستقبل میں ذیابیطس سے تحفظ کے لیے بے حد اہم ہ