12 سال کی عمر میں اپنا اسمارٹ فون رکھنا بچوں کے لیے کتنا خطرناک ہے؟

طبی جریدے ‘جاما نیٹ ورک اوپن’ (JAMA Network Open) میں شائع ہونے والی ایک نئی امریکی تحقیق کے مطابق 12 سال کی عمر میں اپنا ذاتی اسمارٹ فون رکھنے والے بچوں میں کھانے سے متعلق خرابیوں (Eating Disorders) کی علامات ظاہر ہونے کا امکان ان ہم عمر بچوں کی نسبت نمایاں طور پر زیادہ ہوتا ہے جن کے پاس اپنا فون نہیں ہوتا۔ امریکہ بھر کے تقریباً 9 ہزار کم عمر بچوں اور نوجوانوں کے ڈیٹا پر مبنی اس تحقیق میں انکشاف کیا گیا ہے کہ کم عمری میں اسمارٹ فون کی دستیابی کا براہِ راست تعلق کھانے کے غیر صحت مند رویوں سے جڑا ہوا ہے۔

یونیورسٹی آف کیلیفورنیا، سان فرانسسکو (UCSF) کے شعبہ اطفال کے ایسوسی ایٹ پروفیسر اور تحقیق کے مرکزی مصنف ڈاکٹر جیسن ناگاٹا کا کہنا ہے کہ اسمارٹ فون بچوں کو ایک ایسی ڈیجیٹل دنیا میں داخل کر دیتا ہے جہاں ظاہری شکل و صورت، جسمانی ساخت اور وزن پر مرکوز مواد کی بھر مار ہوتی ہے۔ انہوں نے والدین کو متنبہ کیا کہ بچے کو اسمارٹ فون دینا محض ڈیوائس تھمانا نہیں بلکہ اسے ان تمام پیغامات تک رسائی دینا ہے جو اس میں ڈپریشن، خود اعتمادی میں کمی، زیادہ خوراک کھانے (Binge Eating) اور کھانے کی خرابیوں کو جنم دے سکتے ہیں۔ تاہم محققین کا کہنا ہے کہ یہ نتائج فی الحال اسمارٹ فون کے استعمال اور علامات کے درمیان تعلق کو ظاہر کرتے ہیں، حتمی طور پر سبب بننے کا سائنسی ثبوت فراہم کرنے کے لیے مزید مطالعہ جاری ہے۔