لمبی عمر کیلئے ورزش اور غذا سے بھی زیادہ نیند اہم ہے، امریکی ماہرین

امریکی ماہرین نے تحقیق اور تجربات کی بنیاد پر انکشاف کیا ہے کہ تندرست زندگی اور طویل عمر کے حصول کے لیے نیند کی اہمیت متوازن غذا اور باقاعدہ ورزش سے بھی زیادہ ہے۔

امریکا کی اوریگن ہیلتھ اینڈ سائنس یونیورسٹی کے ماہرین کے مطابق نیند ایک بنیادی حیاتیاتی عمل ہے، جس کے دوران دماغ سمیت جسم کے تمام اعضا دن بھر کی محنت اور تھکن کے بعد خود کو ازسرِنو بحال کرتے ہیں۔ ماہرین کا کہنا ہے کہ نیند کے دوران جسمانی نظام کی مکمل اوورہالنگ ہوتی ہے، جس سے اعضا دوبارہ مؤثر اور بہتر انداز میں کام کرنے کے قابل ہو جاتے ہیں۔

تحقیق میں بتایا گیا ہے کہ مناسب اور معیاری نیند نہ صرف ذہنی کارکردگی میں اضافہ کرتی ہے بلکہ قوتِ مدافعت کو مضبوط بنانے، دل کی صحت برقرار رکھنے اور مجموعی جسمانی توازن کے لیے بھی نہایت ضروری ہے۔ ماہرین نے خبردار کیا ہے کہ نیند کی کمی مختلف جسمانی و ذہنی بیماریوں، ذہنی دباؤ اور قبل از وقت بڑھاپے کا سبب بن سکتی ہے۔

ماہرین صحت کے مطابق بہترین صحت اور طویل عمر کے فوائد حاصل کرنے کے لیے ہر فرد کو 24 گھنٹوں میں کم از کم 7 گھنٹے کی معیاری نیند ضرور لینی چاہیے۔ ان کا کہنا ہے کہ متوازن نیند صحت مند طرزِ زندگی کی بنیاد ہے، جسے نظرانداز کرنا سنگین طبی مسائل کو جنم دے سکتا ہے۔

تحقیق کے مطابق جدید طرزِ زندگی میں نیند کو نظرانداز کرنا ایک بڑھتا ہوا مسئلہ بن چکا ہے، جس پر قابو پانا صحت مند معاشرے کے لیے ناگزیر ہے۔