اچھی نیند سے پیٹ کی چربی کم اور بریسٹ کینسر کا خطرہ کم ہوسکتا ہے، ماہرین

ماہرین صحت کا کہنا ہے کہ اچھی نیند سے پیٹ کی چربی کم ہوتی ہے، جس کے نتیجے میں خواتین میں بریسٹ (چھاتی) کینسر کے خطرے میں کمی آ سکتی ہے۔

ریسرچ کے مطابق بھارت میں خواتین میں بریسٹ کینسر کے کیسز سالانہ تقریباً 6 فیصد بڑھ رہے ہیں، جو تشویشناک ہے۔ اس رجحان کی بڑی وجوہات میں ناکافی نیند، مسلسل ذہنی دباؤ اور بڑھتا ہوا وزن شامل ہیں۔

ماہرین کے مطابق یہ تبدیلی کم عمر خواتین میں بھی تیزی سے دیکھی جا رہی ہے، اور روایتی میموگرافی کے علاوہ آگاہی، احتیاطی تعلیم اور خطرے کی بنیاد پر اسکریننگ کو فروغ دینا ضروری ہے۔

ایک حالیہ تحقیق میں خواتین میں بریسٹ کینسر کے اہم عوامل کے طور پر خراب نیند، دائمی اسٹریس اور پیٹ کے گرد چربی کو نمایاں کیا گیا ہے۔ عالمی تحقیقی اداروں کے ڈیٹا کے مطابق ناقص نیند میلٹونن ہارمون کے اخراج، ایسٹروجن کے توازن، مدافعتی نظام کی کارکردگی اور ڈی این اے کی مرمت کے عمل پر اثر انداز ہوتی ہے، جس سے کینسر کے خطرے میں اضافہ ہوتا ہے۔

ماہرین کا کہنا ہے کہ یہ واحد سبب نہیں، لیکن جب مٹاپا، جسمانی غیرفعالیت اور طرز زندگی کی دیگر خرابیاں شامل ہوں تو خطرہ کئی گنا بڑھ جاتا ہے۔ اگرچہ عمر یا جینیاتی رجحان ناقابل تبدیل عوامل ہیں، خراب نیند ایک اہم قابل تبدیل خطرے کے عنصر کے طور پر سامنے آئی ہے۔

طبی مشاہدات سے ظاہر ہوا ہے کہ طویل عرصے کی نیند کی کمی، نائٹ شفٹ میں کام، ذہنی دباؤ اور میٹابولک خرابیوں کے بعد خواتین میں بریسٹ کینسر کے کیسز بڑھنے کا رجحان پایا گیا ہے۔