سندھ میں رواں سال ملیریا کے 90 ہزار 853 کیسز رپورٹ

کراچی: محکمۂ صحت سندھ نے جاری کردہ اعداد و شمار میں انکشاف کیا ہے کہ رواں سال صوبے بھر میں ملیریا کے کل 90 ہزار 853 کیسز رپورٹ ہو چکے ہیں۔

ترجمان محکمۂ صحت کے مطابق صوبائی دارالحکومت کراچی میں ملیریا کے 772 کیسز سامنے آئے، جن میں سب سے زیادہ متاثرہ علاقہ ضلع ملیر رہا جہاں 249 کیسز رپورٹ ہوئے۔ اس کے علاوہ ضلع جنوبی سے 164، ضلع غربی سے 140 اور ضلع کورنگی سے 135 کیسز ریکارڈ کیے گئے۔ کراچی کے دیگر اضلاع میں ضلع وسطی سے 36، ضلع شرقی سے 34 جبکہ ضلع کیماڑی سے 14 کیسز سامنے آئے۔

صوبے کے دیگر ڈویژنز کے اعداد و شمار کے مطابق حیدرآباد ڈویژن ملیریا سے سب سے زیادہ متاثر ہوا جہاں 35 ہزار 094 کیسز رپورٹ ہوئے۔ اس کے بعد لاڑکانہ ڈویژن سے 27 ہزار 057 کیسز اور شہید بینظیر آباد سے 10 ہزار 200 کیسز سامنے آئے۔

علاوہ ازیں، سکھر ڈویژن سے 9 ہزار 949 جبکہ میرپور خاص ڈویژن سے ملیریا کے 7 ہزار 781 کیسز رپورٹ ہوئے ہیں۔ محکمۂ صحت سندھ نے متعلقہ حکام کو مچھر مار سپرے اور علاج معالجے کی سہولیات کو مزید مؤثر بنانے کی ہدایات جاری کی ہیں۔