سندھ میں کانگو ہیمرجک فیور کے پہلے کیس کی تصدیق

سندھ میں رواں سال کانگو ہیمرجک فیور کے پہلے کیس کی تصدیق ہوگئی ہے، جس کے بعد محکمہ صحت نے صوبے بھر میں الرٹ جاری کر دیا ہے۔ متاثرہ مریض کی شناخت 17 سالہ نوجوان کے طور پر ہوئی ہے جس میں کانگو وائرس کی تمام واضح علامات پائی گئی ہیں اور اسے تشویشناک حالت کے باعث اسپتال کے انتہائی نگہداشت وارڈ (ICU) میں منتقل کر دیا گیا ہے۔

طبی ذرائع کے مطابق متاثرہ نوجوان کو تیز بخار اور جسم کے مختلف حصوں سے خون بہنے کی شکایات ہیں؛ وہ مویشیوں کی دیکھ بھال کے پیشے سے وابستہ تھا۔ واضح رہے کہ کانگو وائرس جانوروں کے جسم پر پائے جانے والے مخصوص کیڑے ‘چیچڑ’ کے کاٹنے یا متاثرہ جانور کے خون سے انسانوں میں منتقل ہوتا ہے۔

عید الاضحیٰ کی آمد سے قبل اس کیس کے سامنے آنے پر محکمہ صحت نے شہریوں کے لیے خصوصی احتیاطی تدابیر جاری کی ہیں۔ حکام نے ہدایت کی ہے کہ مویشی منڈیوں کا رخ کرنے والے اور جانوروں کی دیکھ بھال کرنے والے افراد لازمی طور پر دستانے اور حفاظتی لباس استعمال کریں تاکہ اس مہلک وائرس کے پھیلاؤ کو روکا جا سکے۔