شنگلز ویکسین دل کے امراض سے بھی تحفظ دے سکتی ہے: تحقیق

لندن: ایک نئی طبی تحقیق میں انکشاف ہوا ہے کہ شنگلز (Shingles) کی جدید ویکسین دل کے دورے (Heart Attack) اور فالج (Stroke) کے خطرے کو نمایاں طور پر کم کرنے میں مددگار ثابت ہو سکتی ہے، جس سے ہر سال ہزاروں قیمتی انسانی جانوں کو بچایا جا سکتا ہے۔

آکسفورڈ یونیورسٹی کے ماہرین کی جانب سے امریکہ میں 70,000 سے زائد افراد کے طبی ریکارڈز پر کی جانے والی اس تحقیق میں معلوم ہوا کہ ‘شِنگریکس’ (Shingrex) ویکسین لگوانے والے افراد میں اگلے ساڑھے تین سال کے دوران دل اور دماغ کی شریانوں سے متعلق بیماریوں (Cardiovascular Diseases) کا خطرہ 12 فیصد تک کم دیکھا گیا۔

تحقیق کی قیادت کرنے والے آکسفورڈ یونیورسٹی کے کلینیکل لیکچرر ڈاکٹر میکسم ٹاکے کے مطابق اگر کلینیکل ٹرائلز میں ان نتائج کی حتمی تصدیق ہو جاتی ہے، تو اس ویکسین کا فائدہ روزانہ بلڈ پریشر کم کرنے والی دوا کے برابر ہو سکتا ہے۔ ان کا کہنا تھا کہ بزرگ افراد کو شنگلز کی ویکسین لگانے سے دنیا بھر میں فالج، ہارٹ اٹیک اور ہارٹ فیلئر کے لاکھوں کیسز کو روکا جا سکتا ہے، جو عمر رسیدہ آبادی کی صحت کے تحفظ کے لیے ایک بڑا انقلابی قدم ہو گا۔

واضح رہے کہ شنگلز ایک انتہائی تکلیف دہ اور سنگین بیماری ہے جو چکن پاکس (خسرہ/کانپڑا) کا سبب بننے والے وائرس (Varicella-Zoster Virus) کے دوبارہ فعال ہونے سے پیدا ہوتی ہے۔ یہ وائرس چکن پاکس ٹھیک ہونے کے بعد بھی جسم کے اعصابی نظام میں غیر فعال حالت میں موجود رہتا ہے۔ شنگلز کی وجہ سے جلد پر شدید تکلیف دہ دانے اور اعصابی درد ہوتا ہے، جو بعض اوقات دانے ختم ہونے کے بعد بھی مہینوں یا سالوں تک برقرار رہتا ہے، جسے طبی زبان میں ‘پوسٹ ہرپیٹک نیورلجیا’ (Postherpetic Neuralgia) کہا جاتا ہے۔