عام ویکسین جو عمر بڑھنے کی رفتار میں کمی کرسکتی ہے

سائنس دانوں کو ایک نئی تحقیق میں معلوم ہوا ہے کہ شِنگلز کی ویکسین نہ صرف وائرل انفیکشن سے بچاؤ میں مدد دیتی ہے بلکہ بوڑھے افراد میں حیاتیاتی عمر کے بڑھنے کے عمل کو بھی سست کر سکتی ہے۔

یونیورسٹی آف سدرن کیلیفورنیا کے محققین کے مطابق شِنگلز کی ویکسین، جو عموماً معمر افراد کو دی جاتی ہے، شِنگلز سے بچاؤ کے علاوہ بھی صحت کے کئی فوائد رکھتی ہے اور اسے صحت مند بڑھاپے کے فروغ کے لیے استعمال کیا جا سکتا ہے۔

تحقیق کے دوران 3 ہزار 800 سے زائد افراد کا جائزہ لیا گیا، جس سے معلوم ہوا کہ ویکسین لگوانے والے افراد میں اُن لوگوں کے مقابلے میں حیاتیاتی بڑھاپے اور جسمانی سوزش کی علامات نمایاں طور پر کم تھیں جنہوں نے شِنگلز کی ویکسین نہیں لگوائی تھی۔

تحقیق کی سربراہ مصنفہ جنگ کی کِم کے مطابق یہ ویکسین جسم میں پس منظر میں موجود سوزش کو کم کرنے میں مدد دیتی ہے، جس کے نتیجے میں شِنگلز کا سبب بننے والا وائرس دوبارہ فعال نہیں ہو پاتا۔ ان کا کہنا تھا کہ یہ ویکسین صحت مندی کے ساتھ عمر بڑھنے میں اہم کردار ادا کر سکتی ہے۔

مصنفہ کے مطابق اس تحقیق کے نتائج حالیہ مطالعات کی بھی تائید کرتے ہیں جن میں یہ بات سامنے آئی تھی کہ بوڑھے افراد کو لگائی جانے والی ویکسینز، خصوصاً شِنگلز اور انفلوئنزا کی ویکسین، ڈیمنشیا اور دیگر نیورو ڈی جنریٹیو امراض کے خطرات میں کمی سے منسلک ہیں۔

ماہرین کا کہنا ہے کہ اگر مزید تحقیق میں ان نتائج کی تصدیق ہو جاتی ہے تو مستقبل میں ویکسینیشن کو نہ صرف بیماریوں سے بچاؤ بلکہ عمر رسیدگی کے منفی اثرات کم کرنے کے لیے بھی ایک مؤثر حکمتِ عملی کے طور پر اپنایا جا سکتا ہے۔