شیخ زاید ہسپتال لاہور میں پہلی کامیاب روبوٹک گھٹنے کی سرجری

شیخ زاید ہسپتال لاہور نے طبی شعبے میں ایک نیا سنگِ میل عبور کرتے ہوئے پنجاب کے پبلک سیکٹر میں پہلی بار روبوٹک طریقے سے گھٹنے کی کامیاب تبدیلی (روبوٹک ٹوٹل نی آرتھروپلاسٹی) انجام دے دی ہے۔ اس پیش رفت کے بعد شیخ زاید ہسپتال پنجاب کا پہلا سرکاری ہسپتال بن گیا ہے جہاں یہ جدید ٹیکنالوجی متعارف کرائی گئی ہے۔ یہ آپریشن پروفیسر ڈاکٹر واصف علی شاہ نے ‘آر ای سی ایچ انٹرنیشنل’ کے اشتراک سے سرانجام دیا، جس میں شعبہ آرتھوپیڈکس، اینستھیزیا اور ریڈیالوجی کی ٹیموں نے حصہ لیا۔ ہسپتال انتظامیہ کے مطابق روبوٹک سرجری کے باعث مریض کو کم سے کم تکلیف کے ساتھ انتہائی درست، محفوظ اور عالمی معیار کا علاج میسر آئے گا جس سے ان کی جلد صحت یابی ممکن ہو سکے گی۔