درست غذائی معلومات کےلیے فوڈ کمپوزیشن ڈیٹا بیس کا آغاز

سعودی فوڈ اینڈ ڈرگ اتھارٹی نے ہیلتھ سیکٹر ٹرانسفارمیشن پروگرام کے تحت مملکت کے پہلے ‘سعودی فوڈ کمپوزیشن ڈیٹا بیس’ کا باقاعدہ آغاز کر دیا ہے۔ یہ ڈیٹا بیس اعلیٰ سائنسی معیار کے مطابق تیار کیا گیا ہے جو سعودی عرب بھر میں استعمال ہونے والی مقامی اور روایتی غذاؤں میں موجود توانائی، پروٹینز، کاربوہائیڈریٹس، چکنائی، وٹامنز اور معدنیات کے بارے میں درست غذائی معلومات فراہم کرے گا۔ اس قومی اقدام کا مقصد صحت، تحقیق اور غذائیت سے متعلق پالیسی سازی کو مضبوط بنانا، فوڈ انڈسٹری کو مقامی مصنوعات کی غذائی کیفیت بہتر بنانے میں مدد دینا اور غذائی صحت سے متعلق کمیونٹی میں آگاہی پیدا کرنا ہے۔ مزید برآں، یہ ڈیجیٹل سسٹم ڈویلپرز کو خوراک کا اندازہ لگانے کے لیے جدید ٹولز بنانے کی سہولت بھی فراہم کرے گا۔