سٹاک مارکیٹ میں ریکارڈ بننے کا سلسلہ برقرار، ایک لاکھ 81 ہزار پوائنٹس کی حد بھی عبور

پاکستان اسٹاک ایکسچینج میں مثبت رجحان کے باعث ریکارڈ بننے کا سلسلہ برقرار ہے۔ کاروباری ہفتے کے پہلے روز ہی مارکیٹ میں شاندار تیزی دیکھنے میں آئی، جہاں کاروبار کے آغاز پر 2300 سے زائد پوائنٹس کا اضافہ ریکارڈ کیا گیا۔

ٹریڈنگ کے دوران ہنڈرڈ انڈیکس تیزی کے ساتھ ایک لاکھ 81 ہزار پوائنٹس کی حد عبور کرتے ہوئے ایک لاکھ 81 ہزار 420 پوائنٹس کی بلند ترین سطح پر پہنچ گیا، جو مارکیٹ کی تاریخ کا ایک نیا سنگِ میل ہے۔

واضح رہے کہ گزشتہ کاروباری ہفتے کے اختتام پر بھی پاکستان اسٹاک مارکیٹ میں غیر معمولی تیزی دیکھی گئی تھی، جب ہنڈرڈ انڈیکس 2679 پوائنٹس اضافے کے ساتھ پہلی بار ایک لاکھ 79 ہزار 34 پوائنٹس کی سطح پر بند ہوا تھا۔

ماہرین کے مطابق سرمایہ کاروں کے بڑھتے ہوئے اعتماد، معاشی اشاریوں میں بہتری اور مثبت توقعات کے باعث مارکیٹ میں یہ تیزی دیکھنے میں آ رہی ہے۔