عمر رسیدہ جلد کے زخم بھرنے کی نئی دوا کے حوصلہ افزا نتائج

سائنس دانوں نے ایک ایسی دوا کے حوالے سے انتہائی امید افزا طبی نتائج سامنے لائے ہیں جو عمر بڑھنے کے ساتھ جسم میں جمع ہونے والے خراب، ناکارہ اور مردہ خلیوں کو ختم کرنے میں مدد فراہم کرتی ہے۔ جریدے ‘ایجنگ’ (Aging-US) میں شائع ہونے والی اسن نئی تحقیق میں ‘ABT-263’ نامی دوا کے اثرات کا تفصیلی جائزہ لیا گیا ہے، جس کے ابتدائی تجربات کے مطابق یہ دوا عمر رسیدہ جلد کے زخموں کو تیزی سے بھرنے میں نمایاں طور پر معاون ثابت ہو سکتی ہے۔

بوسٹن یونیورسٹی سے وابستہ محققین نے اس تحقیق کے دوران عمر رسیدہ چوہوں کی جلد پر اس دوا کو براہِ راست لگا کر زخم بھرنے کے عمل کا باریک بینی سے مشاہدہ کیا۔ مطالعے کے نتائج سے معلوم ہوا کہ اس دوا کے استعمال سے جلد میں عمر رسیدگی سے جڑے نقصان دہ خلیوں کی تعداد میں کمی واقع ہوئی، جس کے نتیجے میں زخموں کی بحالی اور بھرنے کے عمل میں زبردست بہتری دیکھی گئی۔

عمر کے ساتھ زخم دیر سے کیوں بھرتے ہیں؟ ماہرین کے مطابق، انسانی عمر میں اضافے کے ساتھ جسم میں ایسے خلیے جمع ہونا شروع ہو جاتے ہیں جنہیں سائنسی اصطلاح میں ‘سینسنٹ سیلز’ (Senescent Cells) کہا جاتا ہے۔ یہ خلیے نہ تو تقسیم ہوتے ہیں اور نہ ہی اپنے افعال درست طریقے سے انجام دیتے ہیں، بلکہ الٹا ان کی موجودگی اردگرد کے صحت مند ٹشوز کے معمول کے افعال اور زخم بھرنے کے قدرتی عمل میں بڑی رکاوٹ بنتی ہے۔ تحقیق میں ABT-263 کے ذریعے انہی خراب خلیوں کا خاتمہ کر کے عمر رسیدہ جلد کی کارکردگی کو بہتر بنایا گیا ہے۔

انسانوں کے لیے علاج کب ممکن ہوگا؟ محققین کا ماننا ہے کہ یہ نتائج مستقبل میں عمر رسیدہ افراد، خصوصاً سرجری یا ڈائبیٹیز جیسی دائمی بیماریوں کی وجہ سے دیر سے بھرنے والے زخموں کے علاج کے لیے نئے دروازے کھول سکتے ہیں۔ تاہم، طبی ماہرین نے اس بات پر زور دیا ہے کہ یہ تجربات فی الحال صرف چوہوں پر کیے گئے ہیں۔ انسانوں میں اس دوا کے محفوظ استعمال اور حتمی مؤثریت کو ثابت کرنے کے لیے مزید تفصیلی کلینیکل ٹرائلز اور تحقیقات درکار ہیں، اس لیے فی الحال اسے انسانی علاج کا حتمی اور باضابطہ طریقہ قرار نہیں دیا جا سکتا۔