راولپنڈی؛ ہولی فیملی اسپتال میں کیرو ابلیشن سے کینسر کا مفت علاج شروع

راولپنڈی کے ہولی فیملی اسپتال میں جدید ترین طبی سہولت فراہم کرتے ہوئے ‘کیرو ابلیشن’ (Cryoablation) مشین کے ذریعے کینسر کے موثر علاج کا باقاعدہ آغاز کر دیا گیا ہے۔ اس جدید طریقۂ علاج کے لیے اسپتال میں 15 پروب پہنچ چکے ہیں، جن میں سے ہر ایک پروب کی مالیت 16 لاکھ روپے ہے اور یہ ہر مریض کے علاج کے لیے صرف ایک ہی بار استعمال کیا جائے گا۔

حکام کے مطابق راولپنڈی کے چار بڑے اسپتالوں میں کینسر کے مریضوں کے کیسز کو فلٹر کرنے کا عمل شروع کر دیا گیا ہے، جن میں جگر (Liver)، پھیپھڑوں (Lungs)، سینے (Breast) اور گردوں (Kidney) کے کینسر میں مبتلا مریض اس جدید علاج کے لیے منتخب کیے جائیں گے۔ اس ٹیکنالوجی کے ذریعے صرف 2 سینٹی میٹر تک کے کینسر ٹیومر والے مریضوں کا علاج ہی ممکن ہو سکے گا، جبکہ 2 سینٹی میٹر سے بڑے ٹیومر کے حامل مریض اس علاج کے لیے اہل قرار نہیں دیے جائیں گے۔

اس جدید علاج کے طریقۂ کار کی وضاحت کرتے ہوئے بتایا گیا ہے کہ کیرو ابلیشن کے ذریعے کینسر کے ٹیومر کو منفی 180 ڈگری درجہ حرارت پر فریز کر کے اور 100 ڈگری حرارت کے ذریعے جلا کر مکمل طور پر ختم کیا جاتا ہے۔ سب سے اہم بات یہ ہے کہ اس مشین کے ذریعے کینسر کا یہ مہنگا علاج مکمل طور پر مفت فراہم کیا جائے گا اور مریضوں سے کسی قسم کے چارجز نہیں لیے جائیں گے۔

ابتدائی مرحلے کے تحت ہولی فیملی اسپتال، بینظیر بھٹو اسپتال، راولپنڈی ٹیچنگ اسپتال اور پی کے ایل آئی سے مریضوں کے کیسز اس مقصد کے لیے بھجوائے جائیں گے۔ علاج سے قبل اسلام آباد کے ‘نوری اسپتال’ کے ماہر ڈاکٹروں سے مریضوں کی لازمی کنسلٹیشن (مشاورت) بھی کی جائے گی۔ پہلے مرحلے میں کل 15 مریضوں کا کیرو ابلیشن کے ذریعے علاج کیا جائے گا، اور ان کے مکمل ہونے کے بعد مزید مریضوں کے لیے نئے پروب فراہم کیے جائیں گے۔