راولپنڈی میں رواں سال ڈینگی کیسز میں نمایاں کمی، صرف 54 مریض رپورٹ

ضلع راولپنڈی میں محکمہ صحت کے مؤثر اقدامات اور سخت سرویلنس کے باعث رواں سال ڈینگی کے مریضوں کی تعداد میں ریکارڈ کمی دیکھنے میں آئی ہے۔ محکمہ صحت کی رپورٹ کے مطابق گزشتہ سال اکتوبر کے دوران 928 مثبت کیسز رپورٹ ہوئے تھے، جبکہ رواں سال اکتوبر میں یہ تعداد محض 54 رہ گئی ہے، اور کسی ہلاکت کی اطلاع نہیں ملی۔ ضلع بھر میں ڈینگی کی روک تھام کے لیے 1,400 ٹیمیں فعال ہیں جنہوں نے 54 لاکھ سے زائد گھروں کی چیکنگ کی۔ اس دوران ایس او پیز کی خلاف ورزی اور لاروا کی موجودگی پر 2,798 ایف آئی آرز درج، 686 مقامات سیل اور مجموعی طور پر 31 لاکھ 56 ہزار روپے سے زائد جرمانہ عائد کیا گیا۔ ڈیٹا کے مطابق پوٹھوہار ٹاؤن کا علاقہ ‘کلیال’ ڈینگی لاروا کی سب سے زیادہ شرح کے ساتھ سرفہرست رہا، جس کے بعد ڈھوک حسو شمالی، لکھن اور ہزارہ کالونی حساس ترین قرار دیے گئے ہیں۔ محکمہ صحت نے شہریوں کو گھروں اور اردگرد پانی جمع نہ ہونے دینے اور احتیاطی تدابیر اختیار کرنے کی ہدایت کی ہے۔