ریبیز سے ہر سال 50 ہزار سے زائد اموات، بچاؤ کیسے ممکن ہے؟

پاکستان میں ہر سال ‘ریبیز’ (Rabies/کتے کے کاٹنے کا مرض) کے باعث 3 ہزار سے 5 ہزار تک اموات واقع ہوتی ہیں۔ ریبیز ایک انتہائی خطرناک وائرل بیماری ہے جو متاثرہ جانوروں خصوصاً کتوں کے کاٹنے، خراش یا لعاب دہن کے ذریعے انسان میں منتقل ہو سکتی ہے۔ ورلڈ اینٹی ریبیز ڈے کے موقع پر ماہرینِ صحت نے خبردار کیا ہے کہ کتے کے کاٹے کو معمولی سمجھنا جان لیوا ثابت ہو سکتا ہے کیونکہ ریبیز کی علامات ظاہر ہونے کے بعد اس مرض سے مریض کی جان بچانا تقریباً ناممکن ہو جاتا ہے، تاہم بروقت ویکسینیشن اور صحیح طبی امداد سے اس سے مکمل بچاؤ ممکن ہے۔

عالمی اعداد و شمار کے مطابق دنیا بھر میں ہر سال تقریباً 59 ہزار افراد ریبیز سے جان بحق ہوتے ہیں، جبکہ پاکستان میں یہ بیماری 99 فیصد کتوں کے کاٹنے سے پھیلتی ہے۔ صحت کے معروف ماہر ڈاکٹر ممتاز خان کے مطابق کتوں کے علاوہ گیدڑ، بندر اور دیگر پالتو یا وحشی جانور بھی اس وائرس کے پھیلانے کا سبب بن سکتے ہیں۔ طبی ماہرین کی ہدایت کے مطابق اگر کتا کاٹ لے تو زخم کو فوراً صابن اور صاف پانی سے مسلسل 15 منٹ تک دھوئین اور بلا تاخیر قریب ترین طبی مرکز پہنچ کر ریبیز کی ویکسین لگوائیں۔ علامات کا انتظار کرنا انتہائی مہلک ہو سکتا ہے، اس لیے عوامی آگاہی کے لیے حکومت کے ساتھ نجی اداروں اور عام شہریوں کو بھی مل کر کردار ادا کرنے کی ضرورت ہے۔