ادویات کی فراہمی کو خودکار بنانے والی روبوٹک فارمیسی متعارف

ہیلتھ کیئر اور ٹیکنالوجی کے شعبے میں ایک بڑی انقلابی پیش رفت سامنے آئی ہے۔ کیلیفورنیا میں قائم روبوٹکس کے شعبے میں ابھرتی ہوئی کمپنی ‘کیو’ (Queue) نے دنیا کی پہلی مکمل طور پر خودکار روبوٹک فارمیسی متعارف کرا دی ہے۔ اس جدید ترین پلیٹ فارم کو ادویات کی فراہمی، ان کی تصدیق اور ترسیل کے پورے عمل کو خودکار بنانے کے لیے ڈیزائن کیا گیا ہے، جس میں انسانی مداخلت کی ضرورت نہ ہونے کے برابر ہوگی۔

ٹیکنالوجی اور ایجادات کی معروف ویب سائٹ ‘انٹرسٹنگ انجینئرنگ’ کی ایک رپورٹ کے مطابق، کمپنی نے اس جدید نظام کی ترقی اور اس کی مختلف مقامات پر تنصیب کے عمل کو تیز کرنے کے لیے 12.6 ملین ڈالر کا بھاری سرمایہ بھی جمع کر لیا ہے۔ یہ نیا سرمایہ پروڈکٹ کی مزید اپ گریڈیشن، کارپوریٹ فارمیسی گاہکوں کے ہاں اس کی تنصیب کے دائرے کو وسیع کرنے اور روبوٹکس، ہارڈ ویئر، سافٹ ویئر اور فارمیسی آپریشنز کے شعبوں میں کمپنی کی انجینئرنگ کی صلاحیتوں کو بڑھانے کے لیے استعمال کیا جائے گا۔

فارمیسی کو خودکار بنانے والے روایتی نظاموں کے برعکس، ‘کیو’ کا یہ نظام ادویات کی فراہمی، تصدیق اور تیاری کے تمام مراحل کو ایک ہی آزاد ورک فلو میں یکجا کرتا ہے۔ یہ پلیٹ فارم ڈسٹری بیوشن کمپنیوں سے آنے والے ادویات کے اصل بند پیکٹ وصول کرتا ہے، جہاں جدید روبوٹ، کمپیوٹر ویژن ٹیکنالوجیز اور خودکار ہینڈلنگ کے طریقے مریض کے لیے ادویات کا حتمی پیکٹ تیار کرنے سے پہلے ان کے ذخیرے، گنتی، فراہمی اور تصدیق کے پورے عمل کو خود سنبھالتے ہیں۔ یہ نظام فی الوقت امریکہ میں ڈاکٹروں کی جانب سے سب سے زیادہ تجویز کی جانے والی 250 ادویات کو سپورٹ کرتا ہے، جس سے روزمرہ کے نسخوں کے ایک بہت بڑے حصے کا احاطہ ہو جاتا ہے۔ اس میں حفاظت اور تصدیق کے کئی خودکار مراحل بھی شامل ہیں تاکہ ادویات کی فراہمی میں غلطی کا امکان صفر رہے اور درستی برقرار رکھی جا سکے۔

کمپنی کا کہنا ہے کہ یہ روبوٹک فارمیسی روایتی فارمیسیوں کے مقابلے میں نسخے تیار کرنے کے آپریشنل اخراجات کو 96 فیصد تک کم کرنے کی صلاحیت رکھتی ہے۔ اس ماڈیولر نظام کو ریٹیل فارمیسیوں، ہسپتالوں، کلینکس اور بالخصوص دیہی و دور دراز کے علاقوں میں صحت کی سہولیات کے لیے ڈیزائن کیا گیا ہے تاکہ روایتی عملے کے ماڈل کے بغیر بھی مریضوں کے قریبی مقامات پر ادویات کی خدمات تک رسائی کو وسیع کیا جا سکے۔ کمپنی پہلے ہی اس نظام کا ایک فعال تجارتی ماڈل تیار کر کے اپنے پہلے گاہک کے طور پر فارمیسیوں کی ایک بڑی قومی زنجیر (نیشنل چین) کے ساتھ معاہدہ کر چکی ہے، جو حقیقی فارمیسی ماحول میں اس ٹیکنالوجی کی افادیت کا پہلا عملی ثبوت ہے