آئی جی جیل پنجاب کا بڑا اقدام: تمام جیل ملازمین کیلئے ہیلتھ اور نفسیاتی سکریننگ لازمی

انسپکٹر جنرل جیل خانہ جات پنجاب، میاں سالک جلال نے پنجاب بھر کی جیلوں کے تمام ملازمین کے لیے باقاعدہ ہیلتھ اور نفسیاتی اسکریننگ لازمی قرار دے دی ہے۔ آئی جی جیل خانہ جات کے آفس سے جاری باقاعدہ مراسلے کے مطابق لاہور سمیت صوبے کی تمام جیلوں میں رواں ہفتے سے اسٹاف کے ہیلتھ ٹیسٹ شروع کیے جائیں گے۔ احکامات کے تحت ہر جیل میں ہر 3 ماہ بعد ہیلتھ اسکریننگ کیمپ لگایا جائے گا جبکہ تمام ملازمین کا سالانہ طبی معائنہ بھی لازمی ہوگا، جس میں بلڈ پریشر، شوگر، کولیسٹرول اور وزن کی جانچ شامل ہوگی۔ مراسلے میں ہدایت کی گئی ہے کہ طویل اوقاتِ کار اور 24 گھنٹے ڈیوٹی کے شدید دباؤ کے باعث ملازمین میں ہائی بلڈ پریشر، شوگر اور دل کے امراض کے خطرات بڑھے ہیں، جس کے پیشِ نظر ڈپریشن کا شکار ملازمین کو مفت نفسیاتی مشاورت (Psychological Counseling)، ورزش اور کھیلوں کے مواقع فراہم کیے جائیں گے۔ مزید برآں، ہر جیل میں افسران کے جسمانی و نفسیاتی ٹیسٹ کے بعد ان کی ایک خفیہ ہیلتھ فائل بھی مرتب کی جائے گی، جس کے لیے تمام ڈی آئی جیز اور جیل سپرنٹنڈنٹس کو باقاعدہ ہدایات جاری کر دی گئی ہیں۔