پنجاب میں مختلف ہسپتالوں کے ایم ایس کے تقرر و تبادلے

حکومت نے پنجاب کے مختلف سرکاری ہسپتالوں کے میڈیکل سپرنٹنڈنٹس کے تقرر و تبادلے کر دیے ہیں، جس کا نوٹیفکیشن سپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ نے جاری کر دیا ہے۔

نوٹیفکیشن کے مطابق پروفیسر ڈاکٹر حفیظ معین الدین کو جناح ہسپتال لاہور کا ایم ایس مقرر کر دیا گیا ہے جبکہ پروفیسر محسن شاہ کو ایم ایس کے عہدے سے ہٹا کر جناح ہسپتال میں پی ایم او تعینات کیا گیا ہے۔ ڈاکٹر عبدالرحمان کو بہاول وکٹوریہ ہسپتال بہاولپور کا ایم ایس، اور ڈاکٹر اعجاز احمد بٹ کو ہولی فیملی ہسپتال راولپنڈی کا میڈیکل سپرنٹنڈنٹ مقرر کیا گیا ہے۔

اسی طرح ڈاکٹر مامون اکبر قریشی کو میاں منشی ڈی ایچ کیو ہسپتال لاہور، ڈاکٹر رانا خرم آفتاب کو گورنمنٹ ٹیچنگ ہسپتال شاہدرہ، ڈاکٹر کامران آصف کو چلڈرن ہسپتال ملتان، اور ڈاکٹر سعود افضل عزیز کو عزیز بھٹی شہید ٹیچنگ ہسپتال گجرات کا ایم ایس مقرر کیا گیا ہے۔

نوٹیفکیشن کے مطابق ڈاکٹر فیصل وحید کو ساہیوال ٹیچنگ ہسپتال، ڈاکٹر سید فخر عباس شاہ کو نشتر ٹو ملتان، جبکہ ڈاکٹر امتیاز احمد رانا کو گوجرانوالہ ٹیچنگ ہسپتال کا میڈیکل سپرنٹنڈنٹ تعینات کیا گیا ہے۔ یہ تمام تقرریاں پی سی ایس ایکٹ 1974 کے تحت کی گئی ہیں۔