پنجاب حکومت کا غیر معیاری ادویات کے خلاف بڑا ایکشن

لاہور: پنجاب حکومت نے غیر معیاری ادویات کے خلاف بڑا ایکشن لیتے ہوئے دو ادویات مارکیٹ سے واپس لینے کا حکم دے دیا۔

محکمہ صحت کی جانب سے جاری کردہ الرٹ کے مطابق سیٹریزین 10mg ٹیبلٹ اور آئیورمیکٹن انجیکشن کو غیر معیاری قرار دیتے ہوئے ری کال نوٹس جاری کر دیا گیا ہے۔ غیر معیاری ہونے کی وجہ سے انسانی اور ویٹرنری ادویات پر بھی پابندی عائد کر دی گئی ہے۔

ڈرگ ٹیسٹنگ لیبارٹری نے ادویات کو صحت کے لیے مضر قرار دیا اور دوا ساز کمپنیوں کو ہدایت دی کہ وہ فوری طور پر متعلقہ بیچ واپس لیں۔ محکمہ صحت نے میڈیکل سٹورز اور فارمیسیز کو بھی ادویات کی فروخت فوری بند کرنے کا حکم جاری کر دیا۔

محکمہ صحت نے عوام سے کہا ہے کہ وہ مشکوک بیچ استعمال نہ کریں کیونکہ غیر معیاری ادویات کے استعمال سے مضر اثرات کا خدشہ ہے۔ ساتھ ہی ڈرگ کنٹرول ڈیپارٹمنٹ نے جعلی اور غیر معیاری ادویات کے خلاف سخت نگرانی اور کارروائیاں مزید تیز کرنے کا اعلان کیا ہے۔