پنجاب کے میڈیکل کالجز میں ایم بی بی ایس کی 475 اضافی نشستیں بڑھانے کی تجویز

پنجاب کے 17 سرکاری میڈیکل کالجز میں ایم بی بی ایس (MBBS) کی نشستوں میں اضافے کی اہم تجویز سامنے آگئی ہے۔ ذرائع کے مطابق صوبے کے تدریسی ہسپتالوں میں بیڈز کی تعداد میں اضافے کے بعد پاکستان میڈیکل اینڈ ڈینٹل کونسل (PMDC) کے مقررہ معیار کے مطابق مجموعی طور پر 475 اضافی نشستیں بڑھانے کے لیے محکمہ سپیشلائزڈ ہیلتھ کیئر اینڈ میڈیکل ایجوکیشن نے باضابطہ درخواست دے دی ہے۔ اس وقت پنجاب کے سرکاری میڈیکل کالجز میں ایم بی بی ایس کی مجموعی طور پر 3 ہزار 476 نشستیں موجود ہیں۔

پیش کردہ تجاویز کے مطابق کنگ ایڈورڈ میڈیکل یونیورسٹی لاہور میں نشستیں 325 سے بڑھا کر 350 (25 اضافی) کرنے کی سفارش کی گئی ہے۔ نشتر میڈیکل کالج ملتان، سروسز انسٹیٹیوٹ آف میڈیکل سائنسز لاہور، پنجاب میڈیکل کالج فیصل آباد، شیخ زید میڈیکل کالج رحیم یار خان، ساہیوال، گوجرانوالہ اور امیرالدین میڈیکل کالج میں 50، 50 اضافی نشستیں بڑھانے کی تجویز ہے۔ علاوہ ازیں قائد اعظم میڈیکل کالج بہاولپور میں 25 اور ڈی جی خان میڈیکل کالج میں 30 اضافی نشستیں شامل کرنے کی سفارش کی گئی ہے۔ محکمہ سپیشلائزڈ ہیلتھ کیئر نے حکومتِ پنجاب سے استدعا کی ہے کہ ان 475 اضافی نشستوں پر تعلیمی سیشن 25-2024ء میں ہی داخلوں کی اجازت دی جائے۔