بچوں کیلئے پنجاب کا پہلا برن یونٹ چلڈرن ہسپتال میں تیار

لاہور: چلڈرن ہسپتال میں بچوں کا صوبے کا پہلا اور جدید ترین برن یونٹ مکمل طور پر تیار کر لیا گیا ہے، جو جھلس جانے والے بچوں کو مخصوص اور علاج معالجے کی اعلیٰ ترین سہولیات فراہم کرے گا۔

ترجمان محکمہ صحت پنجاب کے مطابق بچوں کے لیے قائم کیا جانے والا یہ خصوصی برن یونٹ 30 بستروں پر مشتمل ہے، جس میں انتہائی نگہداشت کے لیے 8 آئی سی یو (ICU) بیڈز اور 3 جدید ترین آپریشن تھیٹرز شامل کیے گئے ہیں۔ اس یونٹ کا مقصد جھلسنے کے واقعات کا شکار ہونے والے معصوم بچوں کو فوری اور معیاری طبی امداد فراہم کرنا ہے۔

ترجمان نے مزید بتایا کہ برن یونٹ کو فعال بنانے کے لیے ماہر کنسلٹنٹ سٹاف کی بھرتی کا عمل مکمل کر لیا گیا ہے اور میڈیکل افسران کو تعینات کر دیا گیا ہے۔

علاوہ ازیں، بچوں کی دیکھ بھال کے لیے خصوصی تربیت یافتہ نرسنگ اور پیرامیڈیکل سٹاف کی تعیناتی بھی مکمل ہو چکی ہے، جس سے یہ برن یونٹ جلد ہی مکمل طور پر پبلک کے لیے خدمات کی فراہمی شروع کر دے گا