کھانسی کا معروف سیرپ غیرمعیاری اور ملاوٹ شدہ نکلا

Punjab Drug Control Board نے میڈیکل اسٹورز پر جعلی اور غیرمعیاری ادویات کی فروخت کے بعد پانچ ادویات سے متعلق الرٹ جاری کر دیا ہے۔

ٹیسٹنگ کے دوران انکشاف ہوا کہ بعض ادویات کے مخصوص بیچز جعلی اور غیرمعیاری ہیں جو مختلف میڈیکل اسٹورز پر فروخت ہو رہے تھے۔

رپورٹ کے مطابق ہڈیوں اور کیلشیم کے لیے استعمال ہونے والے ملٹی وٹامنز کے مخصوص بیچ جعلی پائے گئے، جبکہ اسلام آباد کی ایک فارماسوٹیکل کمپنی کے نام سے جعلی ملٹی وٹامنز میڈیکل اسٹورز میں فروخت کیے جا رہے تھے۔

ڈرگ کنٹرول بورڈ کے مطابق کھانسی کا ایک معروف سیرپ غیرمعیاری اور ملاوٹ شدہ نکلا، جبکہ درد کے علاج کے لیے استعمال ہونے والا ایک مخصوص انجیکشن بھی غیرمعیاری قرار دیا گیا۔ انجیکشن میں ذرات کی موجودگی کا انکشاف ہوا ہے جو انسانی صحت کے لیے خطرناک ہو سکتی ہے۔

رپورٹ کے مطابق درد کا انجیکشن لاہور جبکہ کھانسی کا سیرپ کراچی میں تیار کیا گیا تھا۔

اس کے علاوہ جانوروں کے علاج میں استعمال ہونے والے دو انجیکشنز بھی غیرمعیاری قرار دیے گئے، جن میں اصل اجزا کی مقدار مقررہ معیار کے مطابق نہیں پائی گئی۔ یہ ادویات لاہور اور کراچی کی فارماسوٹیکل کمپنیوں نے تیار کی تھیں۔

محکمہ صحت پنجاب نے ہدایت جاری کی ہے کہ متعلقہ ادویات کو میڈیکل اسٹورز سے فوری طور پر واپس منگوایا جائے تاکہ عوام کو ممکنہ نقصان سے بچایا جا سکے۔