مریم نواز کا کڈنی ڈے پر خصوصی پیغام: عطیہ کرنے والوں کو خراجِ تحسین

وزیراعلیٰ پنجاب مریم نواز شریف نے عالمی کڈنی ڈے کے موقع پر خصوصی پیغام جاری کیا۔ انہوں نے کہا کہ دنیا بھر میں 85 کروڑ سے زائد افراد گردے کے امراض میں مبتلا ہیں، جو تشویش کا باعث ہے۔

مریم نواز شریف نے گردے عطیہ کرنے والے افراد کے جذبے کو سراہا اور بنیادی نگہداشت کے معالجین کی حوصلہ افزائی کرنے پر زور دیا۔

وزیراعلیٰ نے بتایا کہ صاف پانی پینا، ورزش کرنا اور صحت بخش غذا اختیار کرنا گردے کے امراض کو کنٹرول کرنے میں مددگار ثابت ہوتا ہے۔ کڈنی ڈے صحت مند طرزِ زندگی، متوازن غذا، گردوں کی باقاعدہ جانچ اور گردوں کے فیل ہونے اور دیگر پیچیدگیوں کے علاج کے حوالے سے آگاہی فراہم کرتا ہے۔

انہوں نے کہا کہ پنجاب بھر میں گردوں کے مریضوں کے لیے مفت علاج کی سہولیات فراہم کی جا رہی ہیں، پیچیدہ امراض کے علاج کے لیے ٹرانسپلانٹ کارڈ مہیا کیا گیا ہے، اور ڈائیلسز کے مریضوں کے لیے سالانہ علاج کی حد 10 لاکھ روپے تک بڑھا دی گئی ہے، جس سے ہزاروں مریض مستفید ہو رہے ہیں۔

مریم نواز شریف نے ڈاکٹروں، نرسوں اور طبی عملے کی محنت کو سراہا اور کہا کہ سرکاری ہسپتالوں میں ڈائیلسز سروسز کو نجی شعبے کے تعاون سے بہتر بنایا جا رہا ہے اور جدید مشینری فراہم کی جا رہی ہے۔ انہوں نے فری ڈائیلسز پروگرام کی بھی وضاحت کی اور کہا کہ یہ اقدامات صحت مند اور بھرپور زندگی کے فروغ کے لیے انتہائی اہم ہیں۔