پنجاب میں ایڈز کے کیسز میں خطرناک اضافہ، 45 ہزار سے زائد مریض رپورٹ

پنجاب میں ایڈز کے کیسز میں ہوش ربا اضافے کا انکشاف ہوا ہے، جہاں متاثرہ مریضوں کی تعداد 45 ہزار سے تجاوز کر گئی ہے، جو ملک بھر کے مجموعی مریضوں کا 54 فیصد بنتا ہے۔ رپورٹ کے مطابق، صوبے میں 31 ہزار مرد، 9 ہزار سے زائد خواتین، 2500 سے زائد خواجہ سرا اور 1900 سے زائد بچے اس موذی مرض کا شکار ہیں، جن میں سے تقریباً 29 فیصد مریض علاج کی سہولیات سے محروم ہیں۔ لاہور 10 ہزار سے زائد کیسز کے ساتھ سرفہرست ہے، جبکہ فیصل آباد، ملتان، سرگودھا اور گجرات میں بھی ہزاروں مریض رپورٹ ہوئے ہیں۔ طبی ماہرین نے خبردار کیا ہے کہ غیر رجسٹرڈ مریضوں کی اصل تعداد تین لاکھ سے زائد ہو سکتی ہے، جس کی بڑی وجوہات میں غیر محفوظ انجیکشنز کا استعمال، عطائی ڈاکٹرز، ناقص بلڈ اسکریننگ اور سماجی بدنامی کے ڈر سے ٹیسٹنگ میں ہچکچاہٹ شامل ہیں۔ ماہرین نے حکومت سے مطالبہ کیا ہے کہ وائرس کے خاموش پھیلاؤ کو روکنے کے لیے صحت کے شعبے کی نگرانی اور آگاہی مہم کو مزید مؤثر بنایا جائے۔