نفسیاتی علاج ٹائپ 2 ذیابیطس میں شوگر کنٹرول اور وزن کم کرنے میں مددگار قرار

ایک تاز ترین طبی و سائنسی تجزیے کے مطابق سائیکوتھراپی اور نفسیاتی معاونت پر مبنی علاج ٹائپ 2 ذیابیطس کے مریضوں میں خون کی شوگر کی سطح کو کنٹرول کرنے اور وزن کم کرنے میں انتہائی مددگار ثابت ہو سکتا ہے۔ ٹائپ 2 ذیابیطس سے متاثرہ بالغ افراد پر کیے گئے 52 مختلف مطالعات کے منظم جائزے اور میٹا تجزیے (Meta-analysis) سے یہ بات سامنے آئی ہے کہ ذیابیطس کی دیکھ بھال میں ادویات اور پرہیز کے ساتھ ساتھ نفسیاتی تھراپی کا شمولیت طبی نتائج کو نمایاں طور پر بہتر بناتا ہے۔ تحقیق میں دیکھا گیا کہ کوگنیٹو بیہیویئرل تھراپی (CBT)، کاؤنسلنگ اور موٹیویشنل انٹرویونگ جیسی تکنیکوں کے ذریعے مریضوں کے گلائیکیٹڈ ہیموگلوبن (HbA1c) میں محض تین ماہ کے اندر بہتری ریکارڈ کی گئی، جبکہ طویل مدتی فالو اَپ کے دوران مریضوں کے جسمانی وزن اور باڈی ماس انڈیکس (BMI) میں بھی واضح کمی دیکھنے کو ملی۔

طبی ماہرین کا کہنا ہے کہ ٹائپ 2 ذیابیطس کے مریضوں کو بیماری پر قابو پانے کے لیے مسلسل ادویات، غذائی پرہیز اور ورزش جیسے سخت معمولات پر عمل کرنا پڑتا ہے۔ تاہم، طویل مدتی بیماری کے باعث پیدا ہونے والا ذہنی دباؤ اور جذباتی مسائل مریضوں کو ان پرہیزوں پر قائم رہنے سے روکتے ہیں۔ اس ضمن میں نفسیاتی مداخلت مریضوں کو ذہنی دباؤ سے نمٹنے اور صحت مند طرزِ زندگی اپنانے کی ترغیب دیتی ہے۔ اس نئی تحقیق کے نتائج اس بات کی تصدیق کرتے ہیں کہ ذیابیطس کا علاج صرف جسمانی حد تک محدود رکھنے کے بجائے اگر اس میں ذہنی اور نفسیاتی معاونت بھی شامل کی جائے تو اس سے مریض کی مجموعی صحت پر مثبت اثرات مرتب ہوتے ہیں۔