ملک بھر میں بجلی کا یکساں ٹیرف نافذ کرنے کی تیاری

وفاقی حکومت نے ملک بھر کے بجلی صارفین کے لیے ایک جیسا (یونیفارم) ٹیرف نافذ کرنے کا فیصلہ کر لیا ہے، جس کے تحت ڈسکوز اور کے الیکٹرک کے صارفین پر بھی قومی سطح پر یکساں بجلی نرخ لاگو ہوں گے۔

اس مقصد کے لیے وفاقی حکومت نے نیپرا میں نئے کنزیومر اینڈ ٹیرف کی باضابطہ درخواست دائر کر دی ہے اور بجلی کے موجودہ ٹیرف نوٹیفکیشن میں ترمیم کی تجویز بھی پیش کی گئی ہے۔ درخواست میں مؤقف اختیار کیا گیا ہے کہ ٹیرف ریشنلائزیشن سے اضافی ریونیو میں اضافہ نہیں ہوگا بلکہ یہ اقدام ملک بھر میں ایک ہی بجلی نرخ کو یقینی بنانے کے لیے کیا جا رہا ہے۔

وفاقی حکومت نے درخواست میں مزید کہا ہے کہ بجلی کے شعبے میں مالی استحکام کے لیے سبسڈی کا بتدریج خاتمہ کیا جائے گا، جبکہ صارفین کو ہدفی سبسڈی کے ساتھ یکساں نرخ فراہم کرنے کی تجویز دی گئی ہے۔ اس ضمن میں یونیفارم ٹیرف شیڈول کو منظوری کے لیے وفاقی کابینہ میں بھی پیش کر دیا گیا ہے۔

نیپرا اس درخواست پر 12 جنوری کو سماعت کرے گا، جس کے بعد نیپرا ایکٹ کے سیکشن 31 کے تحت نظرثانی شدہ ٹیرف نوٹیفکیشن جاری کیا جائے گا۔ نیپرا کی منظوری کے بعد نئے بجلی نرخوں کا اطلاق 15 جنوری سے متوقع ہے۔