پوٹاشیم سے بھرپور غذا قلبی مرض کے امکانات کم کر سکتی ہے: تحقیق

ٹِیسائڈ: طبی ماہرین نے انکشاف کیا ہے کہ انسانی جسم میں پوٹاشیم کی متوازن مقدار فالج کے خطرات میں 20 فیصد اور قلبی امراض میں 24 فیصد تک کمی لا سکتی ہے۔ ماہرین کے مطابق دنیا بھر میں لاکھوں افراد پوٹاشیم کی کمی کا شکار ہیں، لیکن وہ اس حقیقت سے لاعلم ہیں، جو کہ مستقبل میں جان لیوا ثابت ہو سکتا ہے۔

ٹِیسائڈ یونیورسٹی کے پروفیسر جان ینگ کا کہنا ہے کہ الٹرا پروسیسڈ غذاؤں کا بڑھتا ہوا استعمال اور نمک (سوڈیم) کی زیادہ کھپت پوٹاشیم کی کمی کی بڑی وجوہات ہیں۔ پوٹاشیم جسم میں اعصابی سگنلز کو منظم کرنے، پٹھوں کے سکڑاؤ، اور دل کی دھڑکن کو متوازن رکھنے میں کلیدی کردار ادا کرتا ہے۔ یہ سوڈیم کے منفی اثرات کو زائل کر کے بلڈ پریشر کو کنٹرول میں رکھنے میں بھی مدد دیتا ہے۔

رپورٹ میں بتایا گیا ہے کہ پوٹاشیم کی معمولی کمی پٹھوں میں کھچاؤ، قبض اور سر درد کا سبب بنتی ہے، جبکہ شدید کمی کی صورت میں ذہنی الجھن، ڈپریشن، سانس کے مسائل اور دل کی بے ترتیب دھڑکن جیسے پیچیدہ مسائل جنم لے سکتے ہیں۔ ماہرین نے مشورہ دیا ہے کہ بہتر صحت کے لیے قدرتی غذاؤں کا انتخاب کیا جائے تاکہ جسم میں پوٹاشیم کی ضرورت کو پورا کیا جا سکے۔