جنوبی پنجاب کے بڑے اضلاع میں نمونیا کے حملے،کئی بچوں کی حالت تشویشناک

جنوبی پنجاب کے بڑے اضلاع ملتان اور بہاولپور میں بچوں میں نمونیا کے حملے تیزی سے بڑھنے لگے ہیں۔ گزشتہ 24 گھنٹوں کے دوران ملتان میں 69 جبکہ بہاولپور میں 21 بچے نمونیا کا شکار ہوئے۔

محکمہ صحت کے مطابق چلڈرن اسپتال ملتان میں 41 بچوں میں نمونیا کی تصدیق ہوئی، نشتر اسپتال میں 16، شہباز شریف اسپتال میں 8 جبکہ ساؤتھ سٹی اسپتال میں 5 بچے نمونیا میں مبتلا پائے گئے۔

اسی طرح بہاولپور میں سر صادق عباسی اسپتال میں 9 اور وکٹوریہ اسپتال میں 11 بچوں میں نمونیا رپورٹ ہوا۔ وکٹوریہ اسپتال کے حکام کے مطابق نمونیا کے شکار 7 بچوں کی حالت تشویشناک ہے، جنہیں خصوصی نگہداشت میں رکھا گیا ہے۔

صحت حکام نے والدین کو ہدایت کی ہے کہ بچوں میں بخار، کھانسی یا سانس لینے میں دشواری کی صورت میں فوری طور پر قریبی اسپتال سے رجوع کریں۔

❓ نمونیا کیا ہے؟

طبی ویب سائٹ ہیلتھ لائن کے مطابق نمونیا پھیپھڑوں کا ایک انفیکشن ہے، جو زیادہ تر وائرس کی وجہ سے ہوتا ہے اور عموماً نزلہ یا زکام کے بعد ظاہر ہوتا ہے۔ یہ بیماری ہلکی بھی ہو سکتی ہے اور بعض اوقات شدید شکل اختیار کر کے جان لیوا ثابت ہو جاتی ہے، خاص طور پر پانچ سال سے کم عمر بچوں میں اس کا خطرہ زیادہ ہوتا ہے۔

⚠️ نمونیا کی وجوہات

ماہرین کے مطابق صحت مند بالغ افراد کا مدافعتی نظام عموماً نمونیا کا مقابلہ کر لیتا ہے، تاہم بچوں میں اس بیماری کی شدت زیادہ ہو سکتی ہے۔
بچوں میں نمونیا کی بڑی وجوہات درج ذیل ہیں:

• ماں کے دودھ کی کمی

• فضائی آلودگی

• غذائیت کی کمی

• سرد موسم میں زیادہ دیر تک رہنا

• کمزور مدافعتی نظام

🔍 نمونیا کی علامات

نمونیا کی علامات بعض اوقات ہلکی نظر آتی ہیں لیکن خطرناک ثابت ہو سکتی ہیں، جن میں شامل ہیں:

• بلغم کے ساتھ کھانسی

• بخار

• زیادہ پسینہ آنا یا سردی لگنا

• معمولی سرگرمی پر سانس پھولنا

• سانس لیتے یا کھانستے وقت سینے میں درد

• شدید تھکاوٹ

• بھوک میں کمی

• متلی یا الٹی

• سر درد

نومولود یا شیر خوار بچوں میں واضح علامات ظاہر نہ بھی ہوں، تاہم دودھ پینے میں دشواری، توانائی کی کمی یا متلی نمونیا کی علامت ہو سکتی ہے۔ پانچ سال سے کم عمر بچوں میں سانس لینے میں دشواری کو نمونیا کی اہم نشانی سمجھا جاتا ہے۔

🏥 علاج

نمونیا کی تشخیص کے لیے ڈاکٹر عموماً سینے کا ایکسرے تجویز کرتے ہیں۔
اگر بیماری وائرس کی وجہ سے ہو تو اینٹی وائرس ادویات دی جاتی ہیں، ساتھ ہی مکمل آرام، مناسب غذا اور وافر مقدار میں پانی پینے کا مشورہ دیا جاتا ہے۔
ماہرین کے مطابق بروقت تشخیص اور علاج نمونیا کی پیچیدگیوں اور اموات سے بچاؤ میں نہایت اہم ہے۔