بیرونِ ملک میڈیکل و ڈینٹل تعلیم کیلئے پی ایم اینڈ ڈی سی رجسٹریشن لازمی قرار

حکومتِ پاکستان نے بیرونِ ملک میڈیکل اور ڈینٹل تعلیم حاصل کرنے کے خواہشمند طلبہ کے لیے سخت قواعد و ضوابط اور نئی اصلاحات کا اعلان کر دیا ہے۔ نائب وزیراعظم اسحاق ڈار کی زیرِ نگرانی قائم کمیٹی نے فیصلہ کیا ہے کہ اب کسی بھی طالب علم کو ایم ڈی کیٹ (MDCAT) پاس کیے بغیر بیرونِ ملک میڈیکل کی تعلیم حاصل کرنے کی اجازت نہیں ہوگی، جبکہ روانگی سے قبل پی ایم اینڈ ڈی سی (PM&DC) کے ساتھ رجسٹریشن کو بھی لازمی قرار دے دیا گیا ہے۔

اصلاحات کے مطابق، بیرونِ ملک میڈیکل ڈگری صرف اسی صورت میں تسلیم کی جائے گی جب وہ ادارہ پی ایم اینڈ ڈی سی کی منظور شدہ فہرست اور عالمی فیڈریشن برائے میڈیکل ایجوکیشن (WFME) سے الحاق شدہ ہو۔ اسحاق ڈار نے میڈیکل کالجز کی شفاف انسپکشن پر زور دیتے ہوئے کہا کہ اس عمل میں کسی بھی قسم کی غفلت برداشت نہیں کی جائے گی۔ نئی پالیسی کے تحت میڈیکل تعلیم کے لیے کم از کم 6200 تدریسی گھنٹے اور 80 فیصد حاضری لازمی ہوگی، جبکہ غیر ملکی گریجویٹس کے لیے پاکستان میں پریکٹس سے قبل نیشنل رجسٹریشن امتحان (NRE) پاس کرنا بھی ضروری ہوگا۔ غیر انگریزی زبان والے ممالک جانے والے طلبہ کو مقامی زبان سیکھنے اور اپنی رہائشی معلومات فراہم کرنے کی بھی ہدایت کی گئی ہے۔