نجی میڈیکل کالجز کو سرکاری اداروں سے زیادہ نشستیں دینے کا تاثر درست نہیں: پی ایم ڈی سی

پاکستان میڈیکل اینڈ ڈینٹل کونسل (PMDC) نے ملک بھر کے میڈیکل اور ڈینٹل کالجز میں نشستوں کی منظوری سے متعلق اپنا سرکاری اور واضح مؤقف جاری کر دیا ہے۔ کونسل کا کہنا ہے کہ تعلیمی اداروں میں نشستوں کی منظوری ہمیشہ مقررہ قانونی اور ضابطہ جاتی فریم ورک کے تحت دی جاتی ہے۔

پی ایم ڈی سی حکام کے مطابق کونسل نے پنجاب، خیبر پختونخوا، بلوچستان اور وفاقی دارالحکومت اسلام آباد کے سرکاری میڈیکل و ڈینٹل کالجز میں مجموعی طور پر 1400 نئی نشستوں کی منظوری دے دی ہے۔ ان کا کہنا تھا کہ نشستوں میں اس اضافے کا بنیادی مقصد خصوصاً پسماندہ اور دور دراز علاقوں سے تعلق رکھنے والے ذہین طلبہ کے لیے اعلیٰ طبی تعلیم تک آسان رسائی کو ممکن بنانا ہے، جس سے طلبہ کو میڈیکل کی تعلیم کے حصول کے لیے مجبوراََ بیرون ملک جانے سے روکنے میں بھی بڑی مدد ملے گی۔

کونسل نے اس تاثر کو سختی سے مسترد کر دیا ہے کہ نجی میڈیکل کالجز کو سرکاری کالجز کے مقابلے میں کوئی ترجیح دی جا رہی ہے یا انہیں زیادہ نشستیں دی گئی ہیں۔ پی ایم ڈی سی کا واضح کرنا ہے کہ سرکاری اور نجی دونوں قسم کے میڈیکل و ڈینٹل کالجز پر یکساں اور سخت ضابطہ جاتی معیار لاگو ہوتے ہیں۔ کونسل نے عزم ظاہر کیا ہے کہ تمام تعلیمی اداروں میں اعلیٰ درجے کی معیاری تعلیمی اور طبی سہولیات کی فراہمی کو ہر صورت یقینی بنایا جائے گا، اور مریضوں کے تحفظ یا میڈیکل تعلیم کے معیار پر کسی قسم کا کوئی سمجھوتہ نہیں کیا جائے گا۔