پلاسٹک کی بوتل سے خطرناک بیماری کی دوا تیار

یونیورسٹی آف ایڈنبرا کے سائنس دانوں نے ایک ایسی جدید تحقیق پیش کی ہے جس نے دنیا کو حیران کر دیا ہے۔ ماہرین نے پلاسٹک کے کچرے کو ایک حیاتیاتی عمل کے ذریعے ایسی دوا میں تبدیل کر دیا ہے جو پارکنسنز (رعشہ) جیسی اعصابی بیماری کے علاج میں معاون ثابت ہوگی۔

تحقیق کے مطابق، سائنس دانوں نے ‘ای کولی’ (E. coli) نامی بیکٹیریا کو جینیاتی طور پر اس طرح تبدیل (Engineer) کیا ہے کہ وہ غذا اور مشروبات کی پیکجنگ میں استعمال ہونے والے پلاسٹک ‘پی ای ٹی’ (PET) کو توڑ کر اسے ‘ایل-ڈی او پی اے’ (L-DOPA) میں بدل دیتا ہے۔ واضح رہے کہ ‘ایل-ڈی او پی اے’ وہ بنیادی جز ہے جو پارکنسنز کے مریضوں کی زندگی بہتر بنانے کے لیے ادویات میں استعمال ہوتا ہے۔

یہ اپنی نوعیت کا پہلا تجربہ ہے جس میں پلاسٹک کچرے کو براہ راست ایک قیمتی دوا بنانے کے لیے استعمال کیا گیا ہے۔ ماہرین کا کہنا ہے کہ پارکنسنز کی ادویات بنانے کے روایتی طریقے فاسل فیول (Fossil Fuels) پر انحصار کرتے ہیں، جبکہ پلاسٹک کا یہ ری سائیکلنگ عمل نہ صرف سستا ہے بلکہ ماحولیاتی اعتبار سے بھی انتہائی پائیدار ہے۔ اس تحقیق سے مستقبل میں فضلے کے خاتمے اور سستی ادویات کی فراہمی میں بڑی مدد ملے گی۔