پمپل سمجھ کر نظر انداز کر دی جانے والی سکِن کینسر کی بڑی علامت

ماہرینِ امراضِ جلد نے خبردار کیا ہے کہ چہرے پر ظاہر ہونے والا ایک بظاہر معمولی سا دانا یا پمپل درحقیقت اسکن کینسر کی علامت بھی ہو سکتا ہے، جسے اکثر لوگ نظر انداز کر دیتے ہیں۔

ماہر امراضِ جلد ڈاکٹر جینی لیو کے مطابق بیسل سیل اسکن کینسر جلد کے کینسر کی سب سے عام قسم ہے، جو عموماً ایک عام دانے، زخم یا ہلکے جلدی مسئلے کی صورت میں ظاہر ہوتا ہے، اسی وجہ سے مریض بروقت توجہ نہیں دیتے۔

ڈاکٹر جینی لیو نے سوشل میڈیا پر شیئر کی گئی ایک ویڈیو میں بتایا کہ بیسل سیل اسکن کینسر اکثر اپنی خطرناک نوعیت کو چھپا لیتا ہے اور ابتدا میں ایک بے ضرر مسئلہ محسوس ہوتا ہے۔ یہ کینسر جلد کے ان بیسل سیلز میں پیدا ہوتا ہے جو نئی جلد بنانے اور پرانے خلیات کو ختم کرنے کا کام کرتے ہیں۔

ماہرین کے مطابق سورج کی الٹرا وائلٹ (UV) شعاعیں اس بیماری کی سب سے بڑی وجہ سمجھی جاتی ہیں۔ یہ کینسر عموماً جلد کے رنگ کے موتی جیسے ابھار یا گلابی دھبے کی شکل میں ظاہر ہوتا ہے اور زیادہ تر سورج سے متاثر ہونے والے حصوں، جیسے چہرہ، سر اور بازوؤں پر پایا جاتا ہے۔

ڈاکٹر جینی لیو کا کہنا ہے کہ بیسل سیل اسکن کینسر جسم کے دیگر حصوں مثلاً سینہ، پیٹ اور حتیٰ کہ نجی اعضاء پر بھی ہو سکتا ہے۔ اگر کوئی زخم یا دانا طویل عرصے تک ٹھیک نہ ہو تو اسے ہرگز نظر انداز نہ کیا جائے۔

انہوں نے زور دیا کہ اسکن کینسر کی بروقت تشخیص اور پہچان ہی مکمل اور مؤثر علاج کی ضمانت ہے، اس لیے کسی بھی غیر معمولی جلدی تبدیلی کی صورت میں فوری طور پر ماہر امراضِ جلد سے رجوع کرنا ضروری ہے۔