پشاور: امراضِ قلب کے ہسپتال سے کارڈیالوجی ڈسپوزیبلز چوری

خیبر پختونخوا کے پشاور انسٹی ٹیوٹ آف کارڈیالوجی سے لاکھوں روپے مالیت کے کارڈیالوجی ڈسپوزیبلز چوری ہونے پر پولیس نے مقدمہ درج کر لیا ہے۔

ہسپتال انتظامیہ کی جانب سے واقعے سے متعلق پولیس کو تحریری درخواست جمع کرائی گئی جس میں سرکاری املاک کے ضیاع پر شدید تشویش کا اظہار کیا گیا۔ ایف آئی آر کے مطابق چوری شدہ سامان میں اہم طبی ڈسپوزیبلز شامل ہیں جبکہ سی سی ٹی وی فوٹیج، انوینٹری ریکارڈ اور دیگر شواہد پولیس کے حوالے کر دیے گئے ہیں۔

مقدمے میں بتایا گیا ہے کہ ملزم مستقل سرکاری ملازم نہیں بلکہ کنٹریکٹ پر تعینات تھا۔ واقعے میں دیگر افراد کی ممکنہ شمولیت کے پہلو پر بھی تفتیش کا دائرہ وسیع کر دیا گیا ہے۔

انتظامیہ نے پولیس سے ملزم کی فوری گرفتاری اور چوری شدہ سامان کی برآمدگی کی استدعا کی ہے، جبکہ پولیس نے قانونی کارروائی شروع کر دی ہے۔