پاکستانی معیشت بحالی کی راہ پر، وزیرِ تجارت کا امریکن بزنس کونسل سے خطاب

وفاقی وزیرِ تجارت جام کمال خان سے امریکن بزنس کونسل کے وفد نے ملاقات کی، جس میں پاکستان کی معاشی صورتحال اور مستقبل کے امکانات پر تبادلہ خیال کیا گیا۔

وزیرِ تجارت نے کہا کہ پاکستان کی معیشت بحالی کی راہ پر گامزن ہے اور گزشتہ تین برسوں میں معاشی اشاریوں میں نمایاں بہتری آئی ہے۔ ان کے مطابق معیشت کی صورتحال آج ڈھائی سے تین سال پہلے کے مقابلے میں کہیں بہتر ہے، آئی ایم ایف پروگرام کے تحت مشکل مگر ضروری فیصلے کیے گئے۔

جام کمال خان نے بتایا کہ شرحِ سود 22.5 فیصد سے کم ہو کر 10.5 فیصد پر آ چکی ہے، مہنگائی 38 فیصد سے کم ہو کر سنگل ڈیجٹس میں آ گئی ہے جبکہ زرمبادلہ کے ذخائر میں تین سے چار گنا اضافہ ہوا ہے۔ انہوں نے کہا کہ پاکستان اسٹاک مارکیٹ کی کارکردگی بھی بہتر رہی ہے اور حکومت و نجی شعبہ مل کر معاشی پالیسی پر کام کر رہے ہیں۔

ملاقات کے دوران امریکن بزنس کونسل نے پاکستان کی معاشی سمت اور اصلاحاتی اقدامات پر اطمینان کا اظہار کیا۔