پاکستان آئندہ چند ہفتوں میں چین میں پانڈا بانڈ جاری کرے گا: وزیر خزانہ

وفاقی وزیر خزانہ محمد اورنگزیب نے چائنہ گلوبل ٹی وی نیٹ ورک (CGTN) کو انٹرویو دیتے ہوئے کہا ہے کہ پاکستان آئندہ چند ہفتوں میں چین میں پانڈا بانڈ جاری کرے گا، جس سے پاک چین مالی تعلقات مزید مضبوط ہوں گے اور پاکستان کو دنیا کی دوسری بڑی کیپیٹل مارکیٹ تک براہِ راست رسائی حاصل ہوگی۔

وزیر خزانہ نے کہا کہ پانڈا بانڈ کے اجرا سے ڈالر پر انحصار کم کرنے میں مدد ملے گی جبکہ چین کے ساتھ مالی تعاون کو نئی وسعت ملے گی۔ ان کا کہنا تھا کہ پاک چین تعلقات اب صرف انفراسٹرکچر تک محدود نہیں رہے بلکہ ایک جامع اقتصادی شراکت داری میں تبدیل ہو چکے ہیں۔

محمد اورنگزیب نے بتایا کہ رواں سال کے پہلے آٹھ ماہ میں پاکستان اور چین کے درمیان دوطرفہ تجارت کا حجم 17 ارب ڈالر تک پہنچ چکا ہے اور چین پاکستان کا سب سے بڑا تجارتی شراکت دار ہے۔

انہوں نے کہا کہ سی پیک کے دوسرے مرحلے کا باقاعدہ آغاز ہو چکا ہے جس میں بزنس ٹو بزنس تعاون پر خصوصی توجہ دی جا رہی ہے۔ وزیر خزانہ کے مطابق زراعت، معدنیات اور ڈیجیٹل معیشت کے شعبوں میں چینی سرمایہ کاری میں نمایاں اضافہ ہوا ہے۔

وزیر خزانہ نے مزید بتایا کہ ہزاروں پاکستانی زرعی گریجویٹس چین میں جدید تعلیم حاصل کر رہے ہیں جبکہ چینی ٹیکنالوجی کمپنیاں پاکستانی آئی ٹی گریجویٹس کو جدید تربیت فراہم کر رہی ہیں، جو مستقبل میں پاکستان کی معاشی ترقی میں اہم کردار ادا کرے گی۔