پاکستان سٹاک مارکیٹ پہلی بار ایک لاکھ 74 ہزار پوائنٹس کی حد عبور کر گئی

پاکستان اسٹاک ایکسچینج نے ایک نئی تاریخی سنگِ میل عبور کر لیا، جہاں کاروباری ہفتے کے پہلے روز ہی مارکیٹ میں زبردست تیزی دیکھی گئی اور ہنڈرڈ انڈیکس پہلی بار ایک لاکھ 74 ہزار پوائنٹس کی سطح سے اوپر چلا گیا۔

کاروبار کے آغاز پر 1900 سے زائد پوائنٹس کے اضافے کے ساتھ ہنڈرڈ انڈیکس 1 لاکھ 74 ہزار 411 پوائنٹس کی بلند ترین سطح پر پہنچ گیا، جس سے سرمایہ کاروں کے اعتماد میں واضح اضافہ نظر آیا۔

مارکیٹ میں آٹو موبائل اسمبلرز، سیمنٹ، کمرشل بینک، کھاد، تیل و گیس کی تلاش و پیداوار کرنے والی کمپنیاں، آئل مارکیٹنگ کمپنیاں (او ایم سیز)، بجلی کی پیداوار اور ریفائنریز کے شعبوں میں بھرپور خریداری دیکھی گئی۔ نمایاں طور پر اے آر ایل، حبکو، ماری، او جی ڈی سی، پی پی ایل، پول، ایچ بی ایل، میزان بینک اور ایم سی بی کے شیئرز مثبت زون میں رہے۔

واضح رہے کہ گزشتہ کاروباری ہفتے کے آخری روز بھی ہنڈرڈ انڈیکس پہلی بار 1 لاکھ 72 ہزار 400 پوائنٹس کی ریکارڈ سطح پر بند ہوا تھا، جس کے بعد رواں ہفتے کے آغاز میں اس نئی بلند ترین سطح کا حصول مارکیٹ کے لیے ایک اہم پیش رفت قرار دیا جا رہا ہے۔