انسداد پولیو کے قطرے نہ پلانے پر والدین کے خلاف کارروائی ہوگی ، قومی اسمبلی میں قانون منظور

پاکستان سے پولیو کے مکمل خاتمے کے لیے قومی اسمبلی نے سخت ترین قوانین کی منظوری دے دی ہے، جس کے تحت اب بچوں کو پولیو سے بچاؤ کے قطرے پلوانا قانونی طور پر لازمی ہوگا۔ نئے قانون کے مطابق، 10 سال سے کم عمر بچوں کے لیے پولیو ویکسین کی تمام ڈوزز مکمل کرنا ضروری ہوگا اور والدین کو نادرا سے باقاعدہ ‘پولیو ویکسینیشن سرٹیفکیٹ’ حاصل کرنا ہوگا۔قانون میں ویکسین سے انکار کرنے والے والدین یا سرپرستوں کے لیے بھاری جرمانے تجویز کیے گئے ہیں۔ پہلی بار انکار پر 50 ہزار روپے اور دوسری بار انکار پر ایک لاکھ روپے جرمانہ عائد کیا جائے گا۔ مزید برآں، تعلیمی اداروں کے لیے لازم ہوگا کہ وہ 10 سال سے کم عمر بچوں سے داخلے کے وقت پولیو سرٹیفکیٹ طلب کریں۔ اس سرٹیفکیٹ کے بغیر شہریوں کو مختلف سرکاری امور کی انجام دہی میں بھی مشکلات کا سامنا کرنا پڑے گا۔ فرنٹ لائن پولیو ورکرز کے تحفظ کے لیے بھی سخت دفعات شامل کی گئی ہیں۔ پولیو ٹیموں پر حملہ کرنے، انہیں ڈرانے یا دھمکانے والے افراد کو 7 سال قید اور بھاری جرمانے کی سزا دی جا سکے گی۔ حکومت خطرناک علاقوں میں ٹیموں کے لیے فول پروف سیکیورٹی فراہم کرے گی اور ورکرز کی فلاح و بہبود کے لیے ایک خصوصی ‘معاونتی فنڈ’ بھی قائم کیا جائے گا۔ بل کے تحت وفاقی دارالحکومت کے لیے پانچ سالہ قومی انسدادِ پولیو حکمت عملی مرتب کی جائے گی۔ پولیو ویکسینیشن سے متعلق تمام مقدمات کی سماعت کا اختیار صرف ڈسٹرکٹ اینڈ سیشن ججز کو ہوگا۔ پاکستان اور افغانستان دنیا کے وہ واحد ممالک ہیں جہاں اب بھی پولیو وائرس موجود ہے، اسی لیے حکومت نے اس مہلک وائرس کی جڑیں کاٹنے کے لیے ان ہنگامی اقدامات کا فیصلہ کیا ہے۔