پاکستان میں ویکسین کی مقامی تیاری کے حوالے سے بڑی پیش رفت

اسلام آباد: ترجمان وزارت صحت نے اعلان کیا ہے کہ پاکستان صحت کے شعبے میں خود انحصاری کی جانب تیزی سے گامزن ہے اور ویکسین سازی میں خود کفالت کے قومی وژن کو عملی جامہ پہنانے کے لیے سعودی عرب کا گیارہ رکنی اعلیٰ سطحی وفد آج پاکستان پہنچ رہا ہے۔

وزیر صحت مصطفی کمال کی گزشتہ سات ماہ کی کوششوں کا نتیجہ یہ ہے کہ ویکسین کی مقامی تیاری کے حوالے سے سعودی عرب کے ہم منصب کے ساتھ تین میٹنگز ہو چکی ہیں، جن میں سرمایہ کاری، تکنیکی تعاون اور ویکسین مینوفیکچرنگ جیسے کلیدی امور پر تفصیلی تبادلۂ خیال کیا گیا۔

ملاقاتوں کے دوران دونوں ممالک کی جانب سے فوکل پرسنز مقرر کیے گئے۔ پاکستان کی طرف سے ڈاکٹر عبید، چیف ایگزیکٹو آفیسر DRAP اور سعودی عرب کی جانب سے منسٹر آف انڈسٹریز کے سینئر ایڈوائزر نزار الحریری کو مقرر کیا گیا۔ اسی تسلسل میں DRAP کے چیف ایگزیکٹو آفیسر اور سعودی وزارتِ صنعت کے ایڈوائزر کے درمیان چھ تفصیلی ملاقاتیں بھی ہوئیں۔

وزیر صحت مصطفی کمال نے کہا:

• “مقامی سطح پر ویکسین کی تیاری ملکی ضروریات کو پورا کرے گی اور اضافی پیداوار کے ذریعے برآمدات کو فروغ دے کر قومی معیشت کو مستحکم کرے گی۔”

• “اعلیٰ معیار اور محفوظ ویکسین کی عوامی دستیابی حکومت کی اولین ترجیح ہے۔”

• “اعلیٰ سطحی وفد کا دورہ ویکسین کی مقامی تیاری کے عمل کو عملی شکل دینے کی جانب ایک فیصلہ کن قدم ثابت ہوگا۔”

ترجمان وزارت صحت نے مزید کہا کہ پاکستان ویکسین کی تیاری میں خود کفالت کے عمل میں پرعزم ہے اور اس کا مقصد نہ صرف ملکی ضروریات کو پورا کرنا بلکہ برآمدات کے ذریعے معیشت کو مضبوط کرنا بھی ہے۔