اسلام آباد: پاکستان میں نیشنل میڈیکل ٹورازم انیشیٹو کا باضابطہ آغاز

اسلام آباد میں پاکستان کے طبی شعبے کے لیے ایک تاریخی سنگ میل عبور کر لیا گیا ہے، جہاں نیشنل میڈیکل ٹورازم انیشیٹو کا باضابطہ آغاز کر دیا گیا ہے۔ اس اقدام کا مقصد پاکستان کو دنیا بھر کے مریضوں کے لیے سستی اور معیاری طبی سہولیات کے ایک علاقائی مرکز (Hub) کے طور پر متعارف کروانا ہے۔

اس اہم منصوبے کا اعلان پاکستان ایسوسی ایشن آف پلاسٹک سرجنز (PAPS) کی سالانہ بین الاقوامی کانفرنس کے دوران کیا گیا۔ اس اقدام کو اسپیشل انویسٹمنٹ فیسیلیٹیشن کونسل (SIFC) کی بھرپور معاونت حاصل ہے، جو ملک میں غیر ملکی سرمایہ کاری اور عالمی معیار کی خدمات کے فروغ کے لیے کوشاں ہے۔

افتتاحی تقریب میں سیکرٹری صحت اسلم غوری اور ڈی جی ایس آئی ایف سی سمیت کئی اعلیٰ حکومتی شخصیات اور بین الاقوامی طبی ماہرین نے شرکت کی۔ کانفرنس میں شریک عالمی مندوبین، بشمول مصر سے تعلق رکھنے والے ڈاکٹر خالد سمیع اور برطانیہ کے پروفیسر ڈاکٹر معظم تارڑ نے پاکستان کی طبی صلاحیتوں اور کانفرنس کے انتظامات کو زبردست خراجِ تحسین پیش کیا اور اسے ایک بڑی کامیابی قرار دیا۔