ملک بھرمیں جعلی ادویات کے خاتمے کا تہیہ کر رکھا ہے، وزیرصحت مصطفٰی کمال

وفاقی وزیرِ صحت مصطفیٰ کمال نے اعلان کیا ہے کہ وفاقی حکومت نے ملک بھر سے جعلی اور غیر معیاری ادویات کے مکمل خاتمے کا تہیہ کر رکھا ہے، جس کے تحت مقامی و ملٹی نیشنل دوا ساز کمپنیوں کے لیے اپنی ادویات پر “ٹو ڈی بار کوڈ” (2D Barcode) سیریل نمبر درج کرنا لازمی قرار دے دیا گیا ہے۔

اسلام آباد میں جعلی ادویات کے خاتمے سے متعلق ٹو ڈی بار کوڈ ٹرائل کے جائزہ اجلاس کی صدارت کرتے ہوئے وفاقی وزیر نے بتایا کہ 9 اکتوبر 2026ء کے بعد تیار یا درآمد ہونے والی ہر دوا پر ٹو ڈی بار کوڈ کی تنصیب قانونی طور پر فرض ہوگی۔ یہ نیا سیکیورٹی نظام پولٹری اور ویٹرنری (جانوروں کی) ادویات پر بھی یکساں لاگو ہوگا۔ وزارتِ صحت ڈریپ (DRAP) کے ذریعے گزشتہ ڈیڑھ سال سے اس اہم نظام پر کام کر رہی تھی اور تمام اسٹیک ہولڈرز کی تربیت کا عمل مکمل کر لیا گیا ہے۔

وزیرِ صحت کا کہنا تھا کہ اس سسٹمز کے ساتھ ایک خصوصی موبائل ایپ متعارف کرائی گئی ہے، جس کے ذریعے عام شہری، میڈیکل اسٹورز اور فارمیسیز اپنے فون سے کسی بھی دوا کا کیو آر/بار کوڈ اسکین کر کے اس کے اصلی یا نقلی ہونے کی فوری تصدیق کر سکیں گے۔ اس ایپ کی مدد سے دوا کی اصل قیمت اور اس کی میعاد ختم ہونے کی تاریخ (Expiry Date) بھی معلوم کی جا سکے گی۔