پاکستان اورمصرکا مشترکہ معاشی لائحہ عمل پر اتفاق

پاکستان اور مصر نے اقتصادی شراکت داری میں نئی پیش رفت کرتے ہوئے مشترکہ معاشی لائحہ عمل پر اتفاق کیا ہے۔ ایس آئی ایف سی کی معاونت سے دونوں ممالک کے درمیان تجارت، سرمایہ کاری اور شعبہ جاتی تعاون کے نئے دور کا آغاز ہوا ہے۔

وفاقی وزیرِ تجارت جام کمال خان نے مصر کے وزیر سرمایہ کاری حسن الخطيب سے ‘ڈی-8’ کے تجارتی وزراء کونسل کی میٹنگ کے دوران اہم ملاقات کی، جس میں تجارت، سرمایہ کاری اور پرائیویٹ سیکٹر کے اشتراک کو بڑھانے پر تفصیلی گفتگو ہوئی۔

ملاقات میں پاکستان اور مصر نے ٹیکسٹائل، زراعت، فارما اور دیگر شعبہ جات میں شراکت داری بڑھانے پر زور دیا اور بندرگاہوں تک باہمی رسائی اور ویزا سہولیات کے ذریعے تجارت کو مضبوط بنانے پر اتفاق کیا۔ دونوں ممالک نے ڈیجیٹل جدید کاری کے ذریعے اقتصادی تعاون مزید مضبوط کرنے، ترجیحی شعبوں کے لیے مشترکہ ورکنگ گروپ تشکیل دینے اور پیش رفت کا باقاعدہ جائزہ لینے پر بھی اتفاق کیا۔

فریقین نے اقتصادی تعلقات، بی ٹو بی روابط اور سرمایہ کاری کے نئے مواقع کو فروغ دینے کے عزم کا اعادہ کیا، جبکہ ایس آئی ایف سی کے مؤثر اقدامات سے پاکستان کے تجارتی و صنعتی شعبے ترقی کی راہ پر مسلسل گامزن ہیں۔