اومیگا 3 کا نیا فائدہ سامنے آگیا، پھیپھڑوں کی صحت سے بھی اہم تعلق

ایک نئی بین الاقوامی طبی تحقیق میں انکشاف ہوا ہے کہ اومیگا 3 فیٹی ایسڈز نہ صرف دل اور دماغ بلکہ پھیپھڑوں کے افعال کو بہتر رکھنے اور ان میں تنزلی کی رفتار کو سست کرنے میں بھی انتہائی اہم کردار ادا کرتے ہیں۔ امریکن جرنل آف ریسپائریٹری اینڈ کریٹیکل کیئر میڈیسن میں شائع ہونے والی اس تحقیق میں کورنیل یونیورسٹی نیویارک کی ڈائریکٹر پیٹریشیا اے کاسانو اور ان کی ٹیم نے 15,063 افراد پر 7 سے 20 سالہ مشاہداتی مطالعے کے علاوہ یورپ کے 5 لاکھ سے زائد افراد کے جینیاتی ڈیٹا کا تجزیہ کیا۔ نتائج سے معلوم ہوا کہ خون میں اومیگا 3 کی مناسب مقدار پھیپھڑوں کی کارکردگی کو سست ہونے سے بچاتی ہے۔ ماہرین کے مطابق مچھلی، خشک میوہ جات اور نباتاتی تیل میں پائے جانے والے اومیگا 3 فیٹی ایسڈز اپنی سوزش ضد (Anti-inflammatory) خصوصیات کی بنا پر پھیپھڑوں کی صحت کے لیے بہترین ہیں، تاہم محض سپلیمنٹس کے بجائے متوازن غذا اور صحتمند طرزِ زندگی کا اپنایا جانا ضروری ہے۔