مٹاپا اور کمزور پٹھے ٹائپ ٹو ذیابیطس کا خطرہ ساڑھے تین گنا بڑھا دیتے ہیں، تحقیق

ایک نئی اور طویل المدتی تحقیق میں یہ انکشاف سامنے آیا ہے کہ جسم میں زائد چربی اور پٹھوں کی کمزوری بیک وقت ہونے کی صورت میں ٹائپ ٹو ذیابیطس کا خطرہ ساڑھے تین گنا تک بڑھ سکتا ہے۔ آسٹریلیا کی کرٹن یونیورسٹی کے ماہرین کی سربراہی میں ہونے والی اس تحقیق میں تقریباً 4 لاکھ 80 ہزار بالغ افراد کی صحت کا 14 سال تک تفصیلی جائزہ لیا گیا۔ تحقیق کے مطابق، جو افراد موٹاپے کے ساتھ ساتھ پٹھوں کی کمزوری کا بھی شکار تھے، ان میں صرف موٹاپے کا شکار افراد کے مقابلے میں ذیابیطس کا خطرہ 19 فیصد زیادہ، جبکہ صرف کم عضلاتی کمیت (پٹھوں کی کم مقدار) رکھنے والے افراد کے مقابلے میں یہ خطرہ 91 فیصد زیادہ دیکھا گیا۔ تحقیق کے مرکزی مصنف ژونگ یانگ گوان کا کہنا ہے کہ یہ نتائج اس عام تاثر کو مسترد کرتے ہیں کہ ذیابیطس کا خطرہ صرف جسمانی وزن سے جڑا ہے، بلکہ یہ ظاہر کرتے ہیں کہ ذیابیطس سے بچنے کے لیے جسمانی وزن کو قابو میں رکھنے کے ساتھ ساتھ پٹھوں کو مضبوط اور صحت مند بنانا بھی انتہائی ضروری ہے۔ ماہرین نے خبردار کیا ہے کہ ٹائپ ٹو ذیابیطس ایک دائمی مرض ہے جو اعصاب، آنکھوں، گردوں، دل کی بیماریوں اور کینسر جیسے مہلک خطرات کا باعث بن سکتا ہے۔