ایچ آئی وی کے بڑھتے کیسز؛ 10 سی سی سرنج پر پابندی نومولود کے علاج کیلیے خطرہ قرار

پاکستان میں ایچ آئی وی کے بڑھتے ہوئے کیسز کے تناظر میں 10 سی سی سرنج پر عائد پابندی کو نومولود بچوں کے علاج کے لیے ایک بڑا خطرہ قرار دے دیا گیا ہے۔ چیئرپرسن نٹاگ (نیشنل امیونائزیشن ٹیکنیکل ایڈوائزری گروپ) پروفیسر ڈاکٹر محمد خالد شفیع نے ڈریپ (DRAP) کے سی ای او کو ایک ہنگامی خط لکھ کر اس پابندی پر فوری نظرِ ثانی کا مطالبہ کیا ہے۔ خط میں موقف اختیار کیا گیا ہے کہ این آئی سی یو (NICU) اور بچوں کے وارڈز میں 10 سی سی سرنج کا کوئی متبادل موجود نہیں ہے اور بچوں کو ادویات کی درست مقدار دینے کے لیے یہ انتہائی ضروری ہے۔ انہوں نے خبردار کیا کہ بغیر سوئی والی 10 سی سی سرنج بچوں کو مائع ادویات اور غذائی فراہمی کے لیے معمول کا طبی آلہ ہے، لہٰذا اس پر مکمل پابندی کے بجائے مخصوص استثنا دیا جائے۔ ڈاکٹر خالد شفیع نے ڈریپ کو ماہرین پر مشتمل مشاورتی کمیٹی تشکیل دینے کی تجویز دیتے ہوئے کہا کہ ایچ آئی وی کی روک تھام اور انفیکشن کنٹرول کے اقدامات سے بچوں کا علاج متاثر نہیں ہونا چاہیے۔