بھارت: خطرناک وائرس کے پانچ کیسز کی تصدیق، ڈاکٹر اور نرسز بھی مبتلا

کولکتہ: بھارت کی مشرقی ریاست مغربی بنگال میں نِپاہ وائرس کے پانچ کیسز کی تصدیق ہوئی ہے، متاثرین میں ڈاکٹرز اور نرسیں بھی شامل ہیں۔ مقامی میڈیا کے مطابق ایک مریض کی حالت تشویشناک ہے۔

غیر ملکی خبررساں اداروں کے مطابق حکام نے بتایا کہ متاثرہ افراد کا علاج کلکتہ اور قریبی اسپتالوں میں جاری ہے جبکہ تقریباً 100 افراد کو احتیاطی طور پر گھروں میں قرنطینہ میں رکھا گیا ہے۔ صحت کے محکمے نے صورتحال پر نظر رکھنے کے لیے نگرانی مزید سخت کر دی ہے۔

نِپاہ وائرس کو عالمی ادارۂ صحت (WHO) نے ہائی رسک پیتھوجن قرار دیا ہے۔ ماہرین کے مطابق یہ وائرس عام طور پر چمگادڑوں سے انسانوں میں منتقل ہوتا ہے، خاص طور پر پھلوں کے ذریعے، اور اس کے لیے فی الحال کوئی ویکسین یا مخصوص علاج دستیاب نہیں۔

امریکی سینٹر فار ڈیزیز کنٹرول (CDC) کے مطابق نِپاہ وائرس کی ابتدائی علامات عام ہوتی ہیں، جن میں بخار، سر درد اور کمزوری شامل ہیں، جس کے باعث بروقت تشخیص مشکل ہو سکتی ہے۔ وائرس کی انکیوبیشن مدت 4 سے 21 دن تک ہو سکتی ہے۔